:: El verbu ::

El mundu ye tal porque somos quiénes a nomalu. La palabra alita la nuesa conciencia de seres humanos. Magar d'ello, davezu, les palabres escaécense. Y el mundu al qu'eses palabres-y daben vida, dexa de ser. Nós, entós, tamién dexamos de ser, escaecemos la nuesa condición humana. Escaecémonos.

:: L'escaezu ::

Estos apuntes nun son otro qu'una visión personal de cómo l'escaezu apoderó la conciencia de la xente, d'un pueblu a pique yá de nun ser tal. Un testimoniu de cómo'l cálabre d'un país vieyu podrez y desúmese adulces, asomáu a los cantiles de la Europa Atlántica.

:: La razón ::

Esto nun ye una gueta. Nun naguo por atopar cómos nin porqués. Seique la razón nun cabe yá nesti mundu. Equí sólo hai sitiu pa los intereses de calter comercial. Esto ye namái qu'una coleición d'impresiones énte l'agonía d'una cultura. La de mio. Un testimoniu d'ello. El de mio.