:: Neoglotocides cismontanos ::

L'usu de la nuesa llinga como arma de confrontación y/o manipulación política -y con ello, l'aniquilación etnocida d'un mundu enteru- nun tien fin: espárdese y medra agora más allá del cordal, nel fedor d'una ignorancia ciego de consigna; mazcaritáu de reivindicación étnica y alendáu pola supuesta progresía socialista. Esa mesma progresía xacobina usurpadora de la memoria d'esti país que, dende va más d'un cuartu sieglu, anecia en mirar de redimir les nueses almes montunes, ciudadanes y llibres.

La estulticia, l'infantilismu y la paranoia qu'amuesen les pallabres d'un tal Abel Pardo en Les Noticies (09/09/07) asusten por penoses. Seríen pa echase a reír sinón fora porque'l grupu políticu que representa dalguien d'esi altor inteleutual, paez ser que tien agora responsabilidaes polítiques nel Ayuntamientu de Lleón. Y les consecuencies d'ello seique nun van dexar de mancar muncho bien a la nuesa llingua.

Faltó-yos tiempu a estos neoglotocides cismontanos pa echar (oh, casualidá!) pola Academia de la Llingua Asturiana y el so llabor granible. Mediocres aprendices de políticos, falen en público ensin ponese coloraos dende l'escuridá de la so fonda y manifiesta ignorancia panfletera, confundiendo l'escomanáu llabor académicu y científicu d'una institución asturiana independiente -que vien trabayando va décades dende Asturies, lleal pa cola totalidá l'idioma y mirando pa cola totalidá'l so dominui llingüísticu-, colos sos propios delirios irredentistes de neonazis de caleya.

Menos mal que los lleoneses Héctor Xil y Nicolás Bartolomé Pérez son quién p'aportar una lluz qu'anima la esperanza de combatir l'absurdu d'esta velea na que miren d'afogar la nuesa voz.