:: ¿Ciudadanos?. ¿Ciudadanía? ::

Estos son los mios principios. Si nun-y presten, tengo otros.

Groucho Marx

El presidente nacional de Ciudadanos-Partido de la Ciudadanía, Albert Rivera, afirmó ayer que la so formación nun apoya la oficialidá de la llingua asturiana, yá que nun detecta demanda social: «Respetamos la demanda que pueda haber para la oficialidad, pero tenemos la percepción de que no hay una mayoría social que la reclame. Sí detectamos que una buena parte de la sociedad pide que se respete el bable y se defienda ese patrimonio cultural, pero no que se le dé la oficialidad» (El Comercio, 19/09/07).

Vaya bluff... la primera na frente. ¡Qué altor cívicu-democráticu!. ¡Qué rescamplante esfuerzu d'honestidá inteleutual!. ¡Qué pergrandes ideólogos tres d'esti neo-partíu, ufriendo el frescor de los sos frutos a la nueva ciudadanía d'esta Europa anquilosada que s'asoma al sieglu XXI daqué tresmanada, pero que proclama a los cuatro vientos que nun se piensa dar entá na batalla por caltener y esparder esa fonte de xusticia universal que son los Derechos Humanos!.

Esto de "Ciudadanos" nun abulta otro qu'otra marca partidista a la gueta la rentabilidá eleutoral onde medra la mala fe y los prexuicios a los que yá mos tienen avezaos los demás de la so clase. A ver, Sr. Rivera y demás acólitos autoproclamaos "defensores de la ciudadanía" (por ciertu, ¿qué "ciudadanía": municipal-provincial, autónómica correspondiente, española... europea occidental, seique?), que nun ye tan difícil:

a) Una llingua ye un patrimoniu cultural, sí, fasta ehí llegamos dalgunos de nós, tristes tresmontanos entá por cepillar...

b) Pero una llingua ye tamién un mediu d'espresión d'una comunidá de falantes. Una llingua nun ye un bien material; una llingua ye un bien inmaterial, vivu y dinámicu, qu'evoluciona nel tiempu d'acordies col so desendolcu por parte los sos propios falantes, normativizáu al empar pola Institución competente (nel casu de nueso, l'Academia de la Llingua Asturiana).

c) Y en cuantes que mediu d'espresión d'esa comunidá de falantes, una llingua tien una trescendencia pública que nun se ye a negar de forma dala: los falantes d'esa llingua tienen derechu a mandase d'ella, esto ye, tienen derechu a vivir na so propia llingua.

d) Asina, una llingua configúrase nos modernos Estaos de Derechu europeos en fonte xeneradora de derechos pa los sos falantes.

e) La falta de regulación del fenómenu llingüísticu acondada pa cola normativa europea y estatal y pa colos Trataos Internacionales que cinquen la materia; xunta la falta reconocencia de los derechos qu'asisten a los sos falantes (ciudadanos d'un supuestu Estáu de Derechu modernu y democráticu), nun fain otro que cebar la insumisión llegal y l'arbitrariedá d'unos Poderes Públicos nun sometíos al Imperiu la Llei, al tiempu qu'esparden una malsana inseguranza xurídica -esi gran cáncanu de tou modernu Estáu de Derechu que se precie- pente la ciudadanía.

Pa saber en concreto de tola regulación xurídica que sofita l'argumentación espuesta, de xuru que-y bastará cola cencia d'esos prestixosos xuristes qu'arropen la so formación política n'Asturies. Y si non, empobínolu con mui bien aquél al Aconceyamientu de Xuristes pol Asturianu, faltaba más.

Pero si, tal y como amuesen les citaes declaraciones del Sr. Rivera, a tala neo-formación política nun-y importa res la salvaguarda los derechos de los asturfalantes (ciudadanos asturianos que queremos facer la nuesa vida mandándonos del nuesu propiu idioma), entós yá sabremos de qué tamos falando en realidá cuando apelamos a conceutos talos como ciudadanu, ciudadanía y... ¡ai! esa dúctil demanda social: yá sabremos de qué tamos falando cuando la clase política a la que pertenez el Sr. Rivera y demás procesionantes, entame a detectar, a nun tardar muncho, la demanda ciudadana de -por exemplu- el recorte de llibertaes en beneficiu la seguranza ciudadana; el recorte de derechos llaborales de los trabayadores en beneficiu l'ameyoramientu la productividá; l'amenorgamientu los derechos de les muyeres en beneficiu la estabilidá social y la natalidá; la repatriación masiva y forzosa d'inmigrantes en beneficiu'l mercáu llaboral y la tranquilidá ciudadana; el recorte de la llibertá d'espresión en beneficiu la estabilidá política; y asina etc., etc., etc... ¿eh?.

Y ello ye que, al traviés d'esti humilde y despreciáu idioma -l'asturianu-, el Dios de les Pequeñes Coses ye quién pa obrar davezu'l milagru d'amosanos la verdadera faz de les coses y de los homes. Y sólo por eso, yá mos paga la pena siguir dando testimoniu d'elli.