:: Asturies 2008 ::

«2008: ¡Que gran paradoxa!. Añu declaráu poles Naciones Xuníes como Añu Internacional de les Llingües, apostando pola promoción de les llingües indíxenes en tolos ámbitos, embaxo la evidencia de que cada dos selmanes desapaez una llingua indíxena nel mundu, según denunciara Survival International nel Día de la Llingua Materna, el pasáu 21 de febreru. Precisamente nel 2005, el Direutor Xeneral de la UNESCO, Koïchiro Matsuura, dicía:

»Les seis mil llingües falaes anguaño na Tierra, vectores del saber, del adeprender, del diálogu y la espresión de la realidá talamente como cada cultura la entiende, contribúin ensin esceición, pola insustituyible orixinalidá que ye propia de caúna d’elles, a medrar y arriquecer el patrimoniu cultural de la humanidá.

»Pol llugar central qu’ocupen n’armadura de cada cultura, les llingües son un factor estratéxicu de primer orde, que convién tener en cuenta al encarar los problemes del futuru, (…) la enseñanza de la llingua materna y el multillingüismu son los puntos cardinales d’un desarrollu respetuosu que garantice a toos y caún el raigón na so cultura d’aniciu y la posibilidá d’abrise a los demás y aprovechar les ventayes d’un mundu pasu ente pasu mas interactivu.

»Bien ye verdá que les llingües, para poder facer dafechu eses funciones, tienen de poder esistir y xorrecer con llibertá pente los falantes que-ys dan vida. Poro, da-ys valir a les llingües significa necesariamente respetar a les muyeres y los homes que les falen y a les cultures de les que son portadores.

»Y entós, ¿qué ficimos nos, a quien matamos, pa sufrir los rigores d’estos platónicos nivelaores centralistes (como los llamó Becerro de Bengoa en 1901, na revista La Ilustración Española y Americana, refiriéndose a los rigores aplicaos por éstos a los defensores de la “lengua madre de los vascongados” –y ya fai 107 años d’aquello-?. La democracia correchamente entendía, ensin emporcala con falsedaes y demagóxicos cacarexos supón que les mayoríes nun impongan a les minoríes obligaciones qu’atenten contra los sos derechos fundamentales.

»Porque poder desendolcase como persona al traviés d’una llingua na qu’un entiende y apriende’l mundu ye, mas qu’un derechu, una condición pal exerciciu de la llibertá. Poro, nun ye humanamente aceutable qu’una llingua muerra por DISCRIMINACIÓN.

»Añu 2008: l’añu nel que responsables con nomes y apellíos apautaron facer el gran PARRICIDIU cultural asturianu. Añu nel qu’aconceyaron pa matar la nuesa llingua materna, la llingua materna de los nuesos fíos, padres, madres, güeles y güelos, roblando la orde de desconectala de la vida.

»Pero alita nes nueses vides y nes nueses pallabres. ¿Cómo puen pretender que digamos adiós a les nueses pallabres, a la nuesa llingua?. Nos y la nuesa Tierra quedaríemos ensin aliendu. Ensin fuelgu. Ensin voz…

»Los coldiciosos impostores, los esfamiaos espiculadores, los axentes del totalitarismu de la Xeneral Inorancia qu’una y otra vuelta manquen y humillen a la Tierra, borrándo-y tolos sos nomes pa facer de les lloses y cortines, embelgues, estayes, seches, vegues, viescos, pumaraes, castañeos, paraxes, llanes y cuestes, coles sos fontes y paseres, los sos ciarros y portielles… un resumen nuna sola espresión de la llingua común a toa esta xentecaya: Suelo Urbanizable.

»Pues éstos tienen d’enterase que les llingües nun muerren si los sos falantes nun quieren.

»Y nos tenemos d’enteranos que’l peor enemigu de la llingua ta en dientro de nos, y llámase mieu. Si, MIEU: si nun somos quien pa enllenar de solicitúes de cambiu de los nuesos nomes a les versiones tradicionales los rexistros civiles, pa dir depués colos correspondientes certificaos a les comisaríes, a les oficines de Tráficu, a la Universidá, al Ayuntamientu, al Bancu pa quitanos d’enriba complexos impuestos y dar a estampa los nuevos documentos d’identidá con arguyu… si nun somos quien pa paralizar l’Alministración con escritos n’asturianu y contenciosos a mamplén por nun atendenos, si nun somos quien pa proyeutanos en carne y güesu más p‘alló de les manifestaciones coleutives de turnu, la llingua nun sedrá quien pa sobrevivinos.

»Añu 2008: añu del 1200 aniversariu de la donación de la CRUZ DE LOS ÁNXELES, 1100 aniversariu de la donación de la CRUZ DE LA VICTORIA, 400 aniversariu del aniciu de l’actividá na UNIVERSIDÁ D’UVIÉU, 200 aniversariu de l’asunción de soberanía de la XUNTA XENERAL…intentu de PARRICIDIU de la Llingua Madre d’Asturies.

»¿Nun la vamos salvar?.

»Faigámosla alitar tolos díes ente nos, nos nuesos trabayos y nes nueses rellaciones sociales. Ellí onde teamos. Pa que podamos dicir, con llibertá:

¡LA LLINGUA ALITA!
¡VIVE LA LLINGUA ASTURIANA!» .

Firma: Xosé Nel Riesgo, xeógrafu (Fundación Belenos). Discursu nel Actu convocáu pola ALLA el 17/07/08 nel Auditoriu Príncipe Felipe d'Uviéu.