:: Adiós al kama-sutra asturianu ::

«Involuntariamente, Humberto Gonzali acaba d'estropiame'l día anunciándome por teléfonu la destrucción d'ún de los grabaos en madera más escepcionales d'Asturies. Nel llugar de Llorío, país de Llaviana, va más de cuatrocientos años, llevantaron un horru como tantos otros qu'alguién talló como ningún. Nun lliñu del horru qu'anguaño se llama de Remixín, un artesanu anónimu representó una escena llibertina que bien-y podía prender les fiebres de la fantasía al futuru (d'aquella) marqués de Sade. Yera pelos años que'l señor de les Españes andaba buscando albañiles pa conmemorar nel Escorial otru combate: el de San Quintín.

»Nel maderu de Llorío vense (perdón: víense hasta va poques feches) tres figures humanes enllazaes nel exerciciu del amor carnal. La del mediu recibe, per delantre y per detrás, les atenciones prominentes de les otres dos. Les rodiyes del tríu dóblense, fallones a saber si pol esfuerzu o pol gustín.

»De magar 1550, década arriba o abaxo, aguantaron la cópula estos tres titanes del sexu. A últimos del sieglu pasáu, algún etnógrafu de paséu pela ribera del altu Nalón alcontróse con ellos, llimpió-yos el mugor de les frentes fatigaes y corrió a dar la noticia: acababa de descubrir el kama-sutra asturianu. Nun vagó pa qu'empezaren a desfilar per Llorío aficionaos a la cultura tradicional y escursionistes (ente ellos yo) que se colaben nes apretures que dexa l'horru cola casa adlátere pa fisgar el sexu preindustrial.

»Esi fue'l principiu de la desgracia. La proliferación de fisgones acabó por aburrir a algún vecín que, cumpliendo les amenaces que nunca nos cayeron embaxo a los que sabíemos d'elles, mangóse un día d'estos na tenobia armáu de preseos de carpinteru y dio-y por fin descansu al ménage à trois centenariu.

»Ye otra manera de dicir que'l talib del escoplu atentó contra'l patrimoniu cultural asturianu, que nos emprobeció un poco más a toos y, mui en particular, a él mesmu.

»¡Hai que ver qué llistos somos los asturianos!

»Un francés, propietarlu d'esa pieza única, diba rompese los cuernos por rentabilizala: diba llenar Llorío de señales apuntando pal so horru y diba imprimir folletos pa la oficina de turismu de la pola, too ello cola cuenta razonabilísima de cobra-y un par d'euros al que quixere ver el kamasutra autóctonu y vende-y una reproducción a escala dotada de movimientu xingón o una camiseta serigrafiada cola imaxe (iniciatives, a too esto, que bien pudieron tener, tamién, les autoridaes de Llaviana, si fueren quien a pensar n'otres galeríes, amás de les mineres).

»Nel mesmu casu, el tópicu diz qu'un portugués diba sentase na subidoria del sexy-horru, melancólicu, tristayu por tolos placeres que-y atafuñó la vida, a contemplar cómo'l tiempu y el foroñu consumíen, ensin remediu, la obra humana.

»L'asturianu, a metá de camín de los dos países y los dos sentimientos, cuando-y entra'l ramalazu, entemezlos y el compuestu precipita bilis. Al propietaru del horru de Remixín, por exemplu, enchárca-y tamién l'alma, a la portuguesa, esi dulce orbayu de la consunción, de la victoria del tiempu sobre la vida y los sos complementos circunstanciales; pero'l cuartu litru de sangre de les Galies, que se nos metió peles venes p'alantre allá en tiempos del rei Alfonso II, fáilu impaciente, nun-y da vagar pa la galvana: llámalu al llabor con vozona rabiada, a aguiyar a los años pigarciosos, a ayudalos na so erosión calmosa, a destruir.

»Él arremángase, foscu, enriba la tenobia, pa pasar el cepillu con rixu mientres, al pie del horru, l'espíritu d'un rapaz vestíu con jubón llargu y calces aldeanes sescude les manes, llimpia forgaxa d'ente les uñes y posa los puños en cadril p'admirar, contentu, la so picia acabante tallar. El cepillu pasa percima'l lliñu y el rapaz fáisenos un poco más treslúcidu, un poco más ralu. Y, con él, el fantasma d'aquel raitán, mil veces tataratataragüelu de los raitanes qu'esti xueves cacen merucos en Llorío, qu'estrenó y sigue estrenando'l picolín del horru. ¡Ris-ras! Y, pel camín que lleva pa Ribota, vien y venía cantando un carru gües fantasmales, que, ¡ris-ras!, van camín de ser nublina. La madera y, pa con ello, el mundu que lo talló: tolo borra'l cepillu xusticieru, que lleva grabáu a fueu un lema foscón: «Colo mío faigo lo que quiero».

»Ya nun tán los tres marchosos de Llorío. Borrólos la ignorancia y la desafección a Asturies: la del que se mangó na tenobia y la de l'administración pública, que se cruzó de brazos mirando pa él, que nun supo atender pal patrimoniu que-y confiamos los ciudadanos. Sobrevivieron a la Contrarreforma, la Inquisición, la francesada, les carlistaes, una minirrevolución, una guerra civil y al nacional-catolicismu; pero nun pudieron pa cola desidia cultural d'un gobiernu democráticu asturianu, fatalmente confabulada cola amargura d'un paisanu que se negó a aceptar que, nel so pueblu, pudiere haber erecciones que durasen mediu mileniu. Qué pena».

Firma: Milio Rodríguez Cueto. La Nueva España, 27/11/08.