:: alea iacta est ::

El maxistráu titular del Xulgáu númberu 3 de lo Contencioso-Alministrativo d'Uviéu, Miguel Ángel Carbajo Domingo, va plantegar énte'l Tribunal Constitucional una custión d'inconstitucionalidá sobre l'artículu 4.2 de la Llei d'Usu y Promoción del Bable/Asturianu. Esta incidencia procesal -que pudiere traer muncho bien interesantes consecuencies pa la interpretación del anormal status xurídicu nel que s'afaya la nuesa llingua dientro l'ordenamientu xurídicu español- encuállase nel procedimientu por vulneración de derechos fundamentales que sigue'l Lletráu del Serviciu Xurídicu del Principáu y Secretariu del Aconceyamientu de Xuristes pol Asturianu Xurde Blanco Puente, escontra la propia Alministración autonómica pola mor la denegación de tramitación de dellos escritos por tar redautaos n'asturianu.

Pa conseguir esti pronunciamientu, foi necesariu impulsar el llabor del maxistráu y recordá-y la so obligación d'imparcialidá y dilixencia, al traviés d'una denuncia énte'l Conseyu Xeneral del Poder Xudicial, que tamién va seguir el so cursu de manera independiente al procesu principal.

Pente les consecuencies que se desprenden del Autu del xuez anunciando la interposición de la custión d'inconstitucionalidá, una perimportante: mentantu'l TC nun se pronuncie sobre la custión, toles alministraciones tan obligaes a tramitar escritos n'asturianu.

Que l'aliendu intelixente de los espíritus de Menandro, Suetonio, Plutarco y Xulio Cesar mos seya propiciu. La noticia, equí.