:: El poder del númberu ::

O meyor, el poder de los númberos. Como les rempuestes son limitaes, tenemos de mirar de facer les entrugues correches. Asina que la entruga nun ye «¿qué o quién somos?», sinón «¿cuántos somos?». Cuido que nun pagará la pena esperar a que nel futuru venga la Doctora Susan Calvin a revelanos que la Humanidá nun sólo perderá’l so derechu al votu, sinón que, en realidá, nunca nun lo tuviera:

— Pero tá usté diciéndome, Susan, que la Sociedá Humanitaria tien razón; que la Humanidá perdió’l so derechu de votu nel futuru...

— Nunca nun lo tuviera enxamás, en realidá. Tuvo siempres a caprichu d’unes fuerces económiques y sociolóxiques que nun caltriaba, de los caprichos del tiempu y de los aldos de la guerra.

Lo que cada vuelta ye más claro, dende que los ciudadanos dexamos de ser tal pa quedanos namás qu'en consumidores. Y parto de la suposición de que seique habríen d’esistir esos supuestos "ciudadanos" a lo menos equí n’Europa; asina mos lo faen albidrar dellos rellumos qu’atopamos pente les estremaes Cartes de Derechos, Convenciones y Constituciones modernes.

Agora yá, nun ye que los nuesos representantes políticos mientan más que falen. Ye que nun faen otro que mentir darréu y de contino. Y faenlo a sabiendes, a la escontra de los derechos qu’un día quiso otorgase una supuesta comunidá de ciudadanos -la ciudadanía- en nome de la Razón y de les Lluces, inventando ya imponiendo una realidá na que, ellos sí, son quiénes pa seguir medrando y engordando ad infinitum. Una realidá imaxinaria enguedeyada na dinámica podre de les redes clientelares y les miseries personales, alimentada na alloriada y depredadora dinámica económica del consumu.

Asina que la cosa nun ye empezar por entrugase: ¿qué somos los asturianos?, ¿qué ye Asturies?; sinón: ¿cuánto(s) somos los asturianos?; y poro, ¿cuánto ye Asturies?. En realidá, los asturianos somos esautamente cuatro gatos; a lo menos eso ye lo que diz esti informe acerca la xente más poderoso n’Espanna: sólo 4 de les 100 persones con más poder en tol Estáu sedríen quién a calificase d’asturianos. Nesti sistema, a Asturies reduciéronla a ser yá namái qu’eso. Y asina mos pinta. Y cuido que muncho mui mal mos va a dir a los ciudadanos que poblamos o tenemos los nuesos referentes culturales llancaos nesta esquina d’Europa, nún escenariu nel que l’actual partitocracia acabe tamién somorguiada na llamuerga d’una etnocracia más o menos tapecida; un escenariu nel que’l conceptu democráticu de "ciudadanía" quede relegáu a los intereses impuestos per estremaes etnies o lobbies d’acordies cola fuerza -numérica, económica, armada- qu’amuese cada cual.

Un debate identitariu plantegáu equí en términos nacional-decimonónicos abúltame a estes altures del sieglu XXI daqué antiguo y ensin xacíu. Que los duros "neocons" refuguen de forma más o menos descarada de los derechos fiyos de los principios lliberal-revolucionarios, o miren d’aprovechase d’ellos y manipulalos nel so propiu beneficiu, nun me choca res. Lo que me quema l’alma ye qu’esa otra castra ramplante y cínica, autoproclamada lliberal o progresista-divinadelamuerte, refugue con verdaderu noxu –en según qué casos y por comenencia propio- l’aplicación a dalgunos de los sos ciudadanos d’unos derechos que se supone habríen ser d’aplicación universal, como ye’l principu d’igualdá énte la llei no que cinca al derechu al usu y desendolcu que tienen los ciudadanos de la so propia llingua.

Esto espéyase doliosamente nún de los casos más sangrantes –por prósimu- y menos conocíos –por pequennu, que non insignificante-. Ye’l de la situación na que los representantes políticos que carecemos n’Asturies anecien en caltener el fenómenu llingüísiticu nesti país. Si miramos per un momentín d’estremar les nueses propies y particulares creyencies -seique la relixón, la identidá sexual y la fe nacional tan mui guapes burbusando nel ámbitu de la más fondera intimidá personal de caún-, nun atopamos razón dala que xustifique la caltenencia de la llaceriosa discriminación que sufren los ciudadanos falantes d’esturianu frente a los ciudadanos falantes de cualisquier otra de les llingües espannoles estremaes del castellán.

Dá-yos igual cualisquier amuesa del valir d’esta llingua. Dá-yos igual que Strindberg, Shakespeare o’l mesmu Horaciu seyan quiénes pa falar n’asturianu. ¿Cómo-yos va importar el valir únicu y universal que representa la propia llingua?. ¿Cómo-yos va importar respetar, y facer por respetar, los más elementales derechos que los falantes d’esa llingua se supón habríen tener nún Estáu que se diz Democráticu y de Derechu y que recueye na so propia Constitución (art. 3.2) el calter "oficial" de toles llingües espannoles estremaes del castellán nos sos respeutives Comunidaes Autónomes?.

A non ser, claro, que camudaren les regles del xuegu y qu’esa suepuesta razón que-yos dio a los nuesos representantes la llexitimidá orixinaria pa detentar el poder políticu y que s’afita na cadarma normativa qu’integra l’ordenamientu –eso que se llama l’Estáu de Derechu-, sustituyérase per simples motivos de rentabilidá partitocrática: somos cuatro gatos. Los ciudadanos falantes d’asturianu somos malpenes mediu millón; y los que somos conscientes d’ello y naguamos pol respetu a los nuesos derechos cívicos, somos menos entá, malpenes unos pocos miles. Y cada vuelta somos menos. Una cifra de votos abondo escosa como pa ser eleutoralmente rentable.

¿Cuándo los ciudadanos mos camudamos en consumidores?. ¿Cuándo la democracia dexó de ser tal pa convertise nesta dexenerada partitocracia?. ¿Hai dalgún ciudadanu d’esti país que camiente en serio que los sos derechos como tal –non yá sólo como falante, esto ye sólo una doliosa amuesa-, van respetase nuna mena d’etnocracia alloriada?. Somos pocos, perpocos... ¿ú queda’l poder d’ún?.