:: Gleichschaltung gegen die Untermensch ::

En rellación con esta paradoxa de la so historia, abondos inteleutuales norteamericanos falaran de “Herrenvolk democracy”, esto ye, de democracia sólo pa “señores” (por usar una expresión de la mena d’eses a les que Hitler yera aficionáu) (Berghe 1967; Fredrickson 1987). Una clara llinia de demarcación ente blancos, per un llau, y negros ya indios per otru, promoviendo rellaciones afitaes na igualdá dientro la propia comunidá blanca. Los miembros d’una aristocracia de clase o color tendíen a considerase “iguales”; la desigualdá impuesta a los escluyíos ye’l reversu d’esta rellación afitada na igualdá ente aquellos qu’exercen el poder pa escluyir “inferiores”.

Domenico Losurdo
Guerra preventiva, americanismu, antiamericanismu. Metaphilosophy, Vol. 35, Nº 3, April 2004

Versión Orixinal. Untermensch: falantes d’asturianu.

- Xuan Bello: Un asturiano falante, ¿nun tien los mesmos derechos qu'un castellano falante?

- Fernando Lastra: Non. Xurídicamente non.

- Xuan Bello: ¿Quier dicir que mio buela, que namás fala asturiano, tien menos derechos que dalquién que fale castellano?

- Fernando Lastra: Non. Tien los mesmos derechos. Lo que pasa ye que cuando fale cola alministración necesariamente tendrá que falar en castellano. ¿Ye eso una merma de los sos derechos? Ye un condicionante. Simplemente tien que falar en castellano.

- Xuan Bello: ¿Y si nun puede?

- Fernando Lastra: Tien que poder.

Entrevista de Xuan Bello (escritor y periodista) a Fernando Lastra (portavoz del PSOE na Xunta Xeneral del Principáu d’Asturies) en Les Noticies, 18 d'avientu de 2008.

V.1.0. Untermensch: negros.

- Xuan Bello: Un negru, ¿nun tien los mesmos derechos qu'un blancu?

- Fernando Lastra: Non. Xurídicamente non.

- Xuan Bello: ¿Quier dicir que mio buela, que ye negra, tien menos derechos que dalquién que seya blancu?

- Fernando Lastra: Non. Tien los mesmos derechos. Lo que pasa ye que cuando trate cola alministración necesariamente tendrá que ser blanca. ¿Ye eso una merma de los sos derechos? Ye un condicionante. Simplemente tien que ser blanca.

- Xuan Bello: ¿Y si nun puede?

- Fernando Lastra: TIEN que poder.

V.1.1. Untermensch: muyeres.

- Xuan Bello: Una muyer, ¿nun tien los mesmos derechos qu'un home?

- Fernando Lastra: Non. Xurídicamente non.

- Xuan Bello: ¿Quier dicir que mio buela, que ye muyer, tien menos derechos que dalquién que seya home?

- Fernando Lastra: Non. Tien los mesmos derechos. Lo que pasa ye que cuando trate cola alministración necesariamente tendrá ser un home. ¿Ye eso una merma de los sos derechos? Ye un condicionante. Simplemente tien que ser home.

- Xuan Bello: ¿Y si nun puede?

- Fernando Lastra: TIEN que poder.

Y asina podríemos seguir ad infinitum, como bien diz VeritasEtSeveritas.

La persabida y percoherente política doctrinaria y unitaria del Partido (Nacional)Socialista Obrero Español (gleichschaltung), perafita d’esta miente la desigualdá impuesta a los “inferiores” (untermensch), esto ye, a los escluyíos (ausgeschlossen) falantes d’asturianu; esos mesmos a los que Lastra acusa nesta entrevista de querer vivir “solos nel monte” -fuera la sociedá-, cargándo-yos asina como que nun quier la cosa con tola responsabilidá de la so (auto)esclusión social; esto ye, cola responsabilidá de la so anunciada (¿seique postergada... yá cercana?) muerte social. Una maniobra mui del gustu nazi. Mesmo que fizo Heinrich Himmler col so discursu de Posen, nel qu’informó a los empresarios y altos oficiales civiles y militares de les SS, involucrándolos como cómplices, espardiendo pente ellos la responsabilidá sobre la Solución Final na que trabayaba.

Como diz VeritasEtSeveritas, la gravedá de les declaraciones de Lastra, la amuesa pública y arguyosa de convicciones fascistes y antidemocrátiques, del so caciquismu paternalista, el so descaráu y manifiestu desacatu al bloque de constitucionalidá que sofita l’ordenamientu xurídicu ye, a cencielles, apavoriante. Y lo que más mieo-y mete a ún pela cabeza, ye qu’un puntu como esti detente responsabilidaes públiques, soltando pela boca coses como éstes:

- Fernando Lastra: Yá, pero yo faigo política. Sí, ehí ta la sociedá catalana, la sociedá belga. El problema ye quien controla depués les acciones d'individuos que consideren que tienen un derechu (y puede que lo tengan, si-yos lu reconocemos xurídicamente). Nun soi tan optimista como usté: la oficialidá (lléase, sigún la versión escoyía: “la igualdá ente negros y blancos”, “la igualdá ente homes y muyeres”, etc...) acentuaría'l conflictu. Nun tengo nenguna razón pa ser optimista nesti tema. Nun creo qu'esti conflictu vaiga resolvese en términos racionales.

- Fernando Lastra: Claro. Si la nuestra posición política nun ta a favor de la oficialidá, nun podemos por coherencia facer un reconocimientu esplícitu de la oficialidá. El Tribunal Constitucional reconoz que puede haber una oficialidá de facto (lléase, sigún la versión escoyía: “una igualdá de facto ente negros y blancos”, “una igualdá de facto ente homes y muyeres”, etc...). Yo nun toi d'alcuerdu. Por eso nun soi partidariu de facer determinaes coses con esti marcu llegal. Yo nun soi partidariu nin siquiera d'una oficialidá (igualdá) de facto, salvo que lo sía de iuris.

Énte too ello, apunta VeritasEtSeveritas que pa Lastra, los mandaos del Conceyu d'Europa -nel que ta'l Tribunal Européu de los Derechos Humanos- son opiniones; los derechos civiles son conflictivos si se reconocen; les Lleis deben aplicase con más o menos intensidá; el reconocimientu xurídicu de derechos de facto ye violencia y atenta contra la dignidá de les persones... Empapizáu cola fedionda doctrina de los nuesos particulares Furchtbare Juristen, abellugáu tres de la impunidá que-y dan les sigles del poder, el discursu que trescala de les sos declaraciones zusmia tanta soberbia, depotismu, despreciu a la ciudadanía, el persabese percima la llei y de los homes, tanta zorronería, tanta incultura, tanta falta d’educación, tan poca prudencia y tanta falta d’empatía como pudiera tener un sociópata. Dexa a ún xeláu. Neto qu’Ayalgueru, entrugámonos ónde aparte d’Asturies, puede un cargu públicu dicir coses tales ensin consecuencia dala...

A nós, como a VeritasEtSeveritas, l’exemplu la güela de Xuan Bello fainos pescanciar el deber que tenemos pa colos nuesos mayores y pa con tolo qu’ellos encarnen. Al sentir esti discursu impúdicu rescampla'l verdaderu oxetivu de la vida; y perfacemos promesa de guardar estes pallabres no más fondero de les nuestres coraes. Y fadremos d’estes pallabres fierro. Y cabruñarémosles.

:: Lluz nel finxu'l Mundu ::

«La etnosfera podría definise como la suma total de tolos pensamientos, idegues, mitos, suaños, intuiciones ya inspiraciones que se formaren gracies al maxín humanu magar del principiu la so conciencia. La etnosfera ye'l gran heriedu la humanidá, un símbolu de tolo que llogremos y la promesa de tolo que podríemos llograr como especie sumamente creativa ya maxinativa que somos.

»Pero d'igual mou que la biosfera ta sufriendo un grave procesu d'erosión, cola consiguiente pérdida d'hábitat, de vida vexetal y animal, la etnosfera tamién carez esti procesu, y a un ritmu tovía más rápidu. El síntoma cabezaleru d'esta grave situación ye la pérda de llinguaxes nel mundu. Cuando caún de los presentes nesta sala vieno al mundu había 6.000 llinguaxes falaos nel planeta. Una llingua nun ye namás un vocabulariu o un conxuntu de regles gramaticales. Ye un destellu del espíritu humanu, el vehículu mediante el cualu s'alumbra l'alma de cada cultura particular. Ye una fuerza xeneradora de la mente, un cauz pa'l pensamientu y un ecosistema de posibilidaes sociales y espirituales. De los 6.000 llinguaxes que se falaben nel mundu cuando naciemos, más de la mitá yá nun se tresmiten a los neños, lo que significa que tan práuticamente muertos. Más de la mitá del legáu inteleutual, social y espiritual de la humanidá perdiose nel lapsu d'un par de xeneraciones. Y cada quince díes, de promediu, muerre un vieyu que llevase con él a la tumba les caberes sílabes d'un antiguu llinguaxe. Munchos opinen, especialmente n'América del Norte, que quiciás el mundu fuera meyor si toos faláramos la mesma llingua, que quiciás sedría más fácil comunicase y entendemos. La mio rempuesta ye siempre la mesma, “¡qué bona idega! Pero qu'esti idioma seya'l tibetanu o el yoruba”. Entós la persona de fala inglesa dase cuenta de sópitu de lo que significaría tar somorguiáu nel silenciu, incapaz de tresmitir la sabiduría de los sos antepasaos a los sos descendientes.

»Muncha xente nun se da cuenta de lo que ta en xueu. El mundu occidental, tan presuntuosu, cree que mientres la so civilización dio tantos avances teunolóxicos al mundu moderno, los demás pueblos del mundu tuvieron inteleutualmente ociosos».

Firma: Wade Davis, en National Geographic vía Nenyure.

:: Adiós al kama-sutra asturianu ::

«Involuntariamente, Humberto Gonzali acaba d'estropiame'l día anunciándome por teléfonu la destrucción d'ún de los grabaos en madera más escepcionales d'Asturies. Nel llugar de Llorío, país de Llaviana, va más de cuatrocientos años, llevantaron un horru como tantos otros qu'alguién talló como ningún. Nun lliñu del horru qu'anguaño se llama de Remixín, un artesanu anónimu representó una escena llibertina que bien-y podía prender les fiebres de la fantasía al futuru (d'aquella) marqués de Sade. Yera pelos años que'l señor de les Españes andaba buscando albañiles pa conmemorar nel Escorial otru combate: el de San Quintín.

»Nel maderu de Llorío vense (perdón: víense hasta va poques feches) tres figures humanes enllazaes nel exerciciu del amor carnal. La del mediu recibe, per delantre y per detrás, les atenciones prominentes de les otres dos. Les rodiyes del tríu dóblense, fallones a saber si pol esfuerzu o pol gustín.

»De magar 1550, década arriba o abaxo, aguantaron la cópula estos tres titanes del sexu. A últimos del sieglu pasáu, algún etnógrafu de paséu pela ribera del altu Nalón alcontróse con ellos, llimpió-yos el mugor de les frentes fatigaes y corrió a dar la noticia: acababa de descubrir el kama-sutra asturianu. Nun vagó pa qu'empezaren a desfilar per Llorío aficionaos a la cultura tradicional y escursionistes (ente ellos yo) que se colaben nes apretures que dexa l'horru cola casa adlátere pa fisgar el sexu preindustrial.

»Esi fue'l principiu de la desgracia. La proliferación de fisgones acabó por aburrir a algún vecín que, cumpliendo les amenaces que nunca nos cayeron embaxo a los que sabíemos d'elles, mangóse un día d'estos na tenobia armáu de preseos de carpinteru y dio-y por fin descansu al ménage à trois centenariu.

»Ye otra manera de dicir que'l talib del escoplu atentó contra'l patrimoniu cultural asturianu, que nos emprobeció un poco más a toos y, mui en particular, a él mesmu.

»¡Hai que ver qué llistos somos los asturianos!

»Un francés, propietarlu d'esa pieza única, diba rompese los cuernos por rentabilizala: diba llenar Llorío de señales apuntando pal so horru y diba imprimir folletos pa la oficina de turismu de la pola, too ello cola cuenta razonabilísima de cobra-y un par d'euros al que quixere ver el kamasutra autóctonu y vende-y una reproducción a escala dotada de movimientu xingón o una camiseta serigrafiada cola imaxe (iniciatives, a too esto, que bien pudieron tener, tamién, les autoridaes de Llaviana, si fueren quien a pensar n'otres galeríes, amás de les mineres).

»Nel mesmu casu, el tópicu diz qu'un portugués diba sentase na subidoria del sexy-horru, melancólicu, tristayu por tolos placeres que-y atafuñó la vida, a contemplar cómo'l tiempu y el foroñu consumíen, ensin remediu, la obra humana.

»L'asturianu, a metá de camín de los dos países y los dos sentimientos, cuando-y entra'l ramalazu, entemezlos y el compuestu precipita bilis. Al propietaru del horru de Remixín, por exemplu, enchárca-y tamién l'alma, a la portuguesa, esi dulce orbayu de la consunción, de la victoria del tiempu sobre la vida y los sos complementos circunstanciales; pero'l cuartu litru de sangre de les Galies, que se nos metió peles venes p'alantre allá en tiempos del rei Alfonso II, fáilu impaciente, nun-y da vagar pa la galvana: llámalu al llabor con vozona rabiada, a aguiyar a los años pigarciosos, a ayudalos na so erosión calmosa, a destruir.

»Él arremángase, foscu, enriba la tenobia, pa pasar el cepillu con rixu mientres, al pie del horru, l'espíritu d'un rapaz vestíu con jubón llargu y calces aldeanes sescude les manes, llimpia forgaxa d'ente les uñes y posa los puños en cadril p'admirar, contentu, la so picia acabante tallar. El cepillu pasa percima'l lliñu y el rapaz fáisenos un poco más treslúcidu, un poco más ralu. Y, con él, el fantasma d'aquel raitán, mil veces tataratataragüelu de los raitanes qu'esti xueves cacen merucos en Llorío, qu'estrenó y sigue estrenando'l picolín del horru. ¡Ris-ras! Y, pel camín que lleva pa Ribota, vien y venía cantando un carru gües fantasmales, que, ¡ris-ras!, van camín de ser nublina. La madera y, pa con ello, el mundu que lo talló: tolo borra'l cepillu xusticieru, que lleva grabáu a fueu un lema foscón: «Colo mío faigo lo que quiero».

»Ya nun tán los tres marchosos de Llorío. Borrólos la ignorancia y la desafección a Asturies: la del que se mangó na tenobia y la de l'administración pública, que se cruzó de brazos mirando pa él, que nun supo atender pal patrimoniu que-y confiamos los ciudadanos. Sobrevivieron a la Contrarreforma, la Inquisición, la francesada, les carlistaes, una minirrevolución, una guerra civil y al nacional-catolicismu; pero nun pudieron pa cola desidia cultural d'un gobiernu democráticu asturianu, fatalmente confabulada cola amargura d'un paisanu que se negó a aceptar que, nel so pueblu, pudiere haber erecciones que durasen mediu mileniu. Qué pena».

Firma: Milio Rodríguez Cueto. La Nueva España, 27/11/08.