:: Lingua Mater ::

21 de Febreru, el Día Internacional de la Llingua Materna, foi proclamáu pola Conferencia Xeneral de la UNESCO en payares de 1999. Tolos años, dende febreru de 2000, esta fecha guárdase y señálase col oxetivu de promover el multillingüismu y la diversidá cultural.

Alrodiu d’esti día, la ONU tien declarao que “les llingües son l’instrumentu de mayor alcance pal caltenimientu y el desendolcu del nuesu patrimoniu cultural tanxible ya intanxible. Toda iniciativa pa promover la difusión de les llingües maternes servirá nun sólo pa incentivar la diversidá llingüística y la educación multillingüe, sinón tamién pa crear mayor conciencia sobre les tradiciones llingüístiques y culturales del mundu ya inspirar a la solidaridá basada nel entendimientu, la tolerancia y el diálogu”.

Equí n’Asturies, nesta escomanada, fedionda y provinciana duerna qu’alimenten los ideólogos de la progresía provinciana, nadie nun s’entera. O meyor, nadie nun se quier dar por enteráu. Equí n’Asturies, la solidaridá basada nel entendimientu, la tolerancia y el diálogu como guíes pa l’articulación d’una sociedá democrática avanzada, va muncho que dexó de ser un fermosu finxu pa pasar a nun ser otro qu’una murnia mentira conseñada nes consignes valeres que proclama esa supuesta progresía. La so doctrina ye tan curtia que manca:

«Casi todos los expertos en lingüística coinciden en que en un siglo habrán desaparecido tres cuartas partes de las lenguas que hoy se hablan en el mundo. Algunos sostienen, incluso, que la diversidad lingüística no es natural, que se debe al aislamiento en que vivían las distintas comunidades humanas cuando nacieron los distintos idiomas, y que el mundo globalizado de hoy, con potentes medios de comunicación accesibles desde todo el planeta (por ejemplo, vía Internet), nos lleva inevitablemente a que en muy pocas generaciones habrá un idioma universal en el que se entenderán todos nuestros bisnietos o tataranietos, vivan donde vivan. Hay incluso quien asegura que ése será un gran avance de la humanidad; que si Babel, la fragmentación lingüística, trajo disensiones y frustración humanas, esa koiné, esa futura lengua común de todos los homo sapiens, traerá progreso y riqueza. Si esto fuera cierto, ¿las políticas de apoyo a lenguas minoritarias (sean el catalán o el gaélico, el euskera o el sardo, el gallego el bearnés) son frenos que se ponen al progreso de la humanidad?» (Arsenio Escolar, en 20 Minutos).

Asina ye que, pa la casposa ya inculta progresía socialista que mos gobierna, fía d’una enxamás superada miseria y desnutrición intelectual bien mamada del franquismu (mirái sinón pa les consignes de la nuesa FSA), la cosa ta clara: el bable al que tanta rocea-y tienen, ye un frenu que s’opón al (so) progresu... esto ye, dicen que s’opón al progresu la humanidá “naturalmente socialista”; poro, la llingua asturiana tien de ser aniquilada, sapozada, escaecida.

Como buenos analfabetos funcionales que son, esta reciella de payotos provincianos que s’entretienen en montase unos a otros engaramaos nel cumal de la nuesa sociedá entafarrando tolo que toquen, que prostituyen ensin vergoña dala conceptos como paz, solidaridá o xusticia, nin siquier se molesten n’atender pa lo que davezu-yos diz al focicu dalgún d’esos rellumantes “Premios Príncipe d’Asturies” a los que conviden tolos años.

La interpretación de Babel que fai George Steiner y que-y resume brillante Wendell a Escolar nún comentariu al so artículu, seique ye una de les más guapes rellectures del mitu qu’enxamás se ficiera. Diz que Babel entendióse como un castigu per munchu tiempu, pero Steiner propón una interpretación perguapa que cásique ye a rehabilitar al tarrecible Dios del Antiguu Testamentu:

L’home nagua por ver a Dios, pero non por soberbia (el pecáu más grande, que ye’l del home y tamién el del Ánxel Cayíu) sinón por voluntá d’acercase a Elli. Y el premiu a esi deséu nun pue ser más importante: Dios regala al home les llingües, estremaes les unes de les otres. Con cauna d’elles poblará l’home una parte del mundu y asina va crear los sos propios rellatos y lliteratura. Con elles, y gracies a la so estructura (Lévi-Strauss dixit), l’home aprenderá a recrear mundos y va ser quién pa facer aportaciones a les otres llingües. Asina, "El Quixote" de Miguel de Cervantes, nun fuera posible ensin el "Tirant lo Blanc" de Joanot Martorell, que a la so vez nun fuera posible ensin Chrétien de Troyes, que a la so vez...

¡Lo triste que diba ser vivir nún mundu con una sola lliteratura, con una sola mena de rellatos!. Pero si ye que’l llinguax verbal va tiempu que coexiste col llinguax matemáticu, pictóricu y agora, con, por exemplu, los llinguaxes informáticos. Anque toos esos progresistes intelectuales post-franquistes anecien en proclamar y vendenos que la humanidá nun sólo sedría quién a funcionar meyor, sinón que progresaría viéndose llimitada a espresase nuna sola llingua, esa mesma llingua (koiné, pero tamién y al empar, lingua mater), a los pocos años, habría tener tantes variantes que seique volveríemos al principiu. Porque eso ye lo que tien esti mundu, que una madre ye lo que ye, por muncho que la vistan de koiné. Y nunca enxamás dexará de selo. Precisamente lo que distigue a la nuesa especie d’otres ye la nuesa capacidá de pensamientu simbólicu, que permite’l milagru del pensamientu abstractu: ensin símbolos (esto ye, ensin la nuesa diversidá cultural de desendolcu fractal) dexamos de ser humanos.

Claro que, a lo meyor eso ye lo que pretenden. Probes. Vivimos na civilizada Europa occidental y tamos en manos d’una élite social comandada por analfabetos funcionales a los que-yos importa una mierda la llingua, seya materna o non; a los que-yos sobra tanta infralliteratura pseudosociopolítica y panfletero-consignataria dixerida malpenes y fálta-yos más honestidá, más métodu científicu y más pensamientu críticu. Amigu Félix, ellos en vardá nun atendíen pa lo que mos decíes... claro, que nós sólo yéramos unos guah.es viendo documentales de bichos na tele mentantu ellos facíen la revolución y corríen delantre los grises y daben la so vida pola llibertá y viaxaben a París. Y eso. Ah, la mantega del tangu.

La llingua, el discursu y el métodu interpretativu, son maleables y muten. Como los mitos. Como Babel. Como la Madre Tierra. Como la nuesa madre a la que, dalgunos, celebramos nesti día.

:: El clientelismu llaboral n'Alministración asturiana ::

«Talantamos que'l clientelismu políticu ye una estensa y encaciñada cadarma de rellaciones d'intercambéu de favores, instrumentada al traviés de los partíos políticos, con poder institucional, nes qu'una de les partes, qu'asume la posición de patrón -el políticu profesional, les élites dirixentes del partíu, una fastera constituyida dientro del mesmu, los cargos públicos qu'ocupen puestos nos muérganos oficiales- qu'apurre a particulares, que tomen la condición de cleintes, dellos beneficios -seya direutamente o entemediando grupos o entidaes xurídiques (empreses, sindicatos, asociaciones y organizaciones non gubernamentales, etc.): subvenciones, subsidios, llicencies o otros permisos alministrativos, recalificaciones urbanístiques, alxudicación de contratos d'obres, servicios o suministros, puestos de trabayu nel seutor públicu, ascensos de sópitu na carrera profesional, etc., a cambé de sofitos y fidelidaes de toa triba: electorales, funcionariales, sindicales, mediátiques, financieres, etc.

»Lo carauterístico d'estes rellaciones de reciprocidá ye que con elles arrequéxase'l marcu de la llegalidá d'estremaes menes y col envís de beneficiar a la cleintela: emplegando les normes de mou fraudulentu, calteniendo la fachada formal mientres se caciquia per detrás, amosando les interpretaciones más afayadices pal cliente o, cenciellamente, tapando los güeyos pa dexar facer. Esti favorecimientu faise, les más de les veces, perxudicando a terceros que tendríen meyor derechu.

»Del clientelismu llaboral, proyectáu na Alministración pública asturiana, vamos falar darréu. De mano, resulta cenciello avanzar delles de les graves consecuencies que tien l'alxudicación clientelar de puestos de trabayu nel sector públicu:

» - Fraya'l derechu fundamental de tolos ciudadanos a algamar un puestu de trabayu n'Alministración en condiciones d'igualdá, méritu y capacidá.

» - Esborona les condiciones d'imparcialidá y oxetividá necesaries pal desendolque de les funciones propies de l'Alministración Pública: la fidelidá de los clientes al partíu políticu qu'allana esi allugamientu amárralos al serviciu de los intereses partidistes del patrón.

» - Prostitúyese la ética pública de los políticos que gobiernen d'esta xera pa los intereses de camaretaes y grupos de poder que-yos sofiten el so estatus profesional.

»Una Alministración Pública nueva, como asocedió cola Comunidá Autónoma asturiana nos primeros años del deceniu de los ochenta del sieglu pasáu, tien de contar con perimportantes recursos humanos pa ponese a furrular. Nesti sen, l'Alministración asorvió de mano los medios materiales y personales de la vieya Diputación Provincial franquista, personificación xurídica del modelu territorial d'organización alministrativa de la dictadura. Les élites funcionariales d'aquella Diputación taben formaes, na so mayor parte, na cultura burocrática del franquismu: emponderamientu de la xerarquía, clasismu llaboral, autoritarismu políticu, servilismu.

»Estos calteres personales, en cuenta d'estorbar los tratos colos dirixentes de la izquierda gobernante, facilitaron la rápida criación de rellaciones clientelares col nuevu patrón, defensor enfotáu del funcionariu combayón. Poro, nos años de xestación de l'Alministración autonómica asturiana la nueva clas política sofitóse na burocracia funcionarial de los cuerpos superiores p'armar ya caltener la rede de rellaciones de control y dominación de les estructures, aparatos y sistemes de repartu de recursos públicos, característica de la partitocracia mercantil de les democracies representatives.

»El procesu arrespuende al conceptu de cleintelismu que definimos enriba: rellaciones de complicidá ya absoluta llealtá de les élites funcionariales a la clas política dirixente a cambéu de beneficios, nesti casu, l'afitamientu vitaliciu nos más altos puestos de la carrera alministrativa ya nos meyores sueldos, produciéndose un braeru fenómenu de patrimonialización de los cargos públicos cimeros por eses élites. Una amuesa d'esti sistema cleintelar dióse va poco cola reconocencia por llei de la Xunta Xeneral del Principáu d'Asturies nel mes d'avientu del añu 2002 del máximu complementu salarial de destín p'aquellos emplegaos públicos que desendolcaren demientres dos años siguíos o tres intermitentes puestos políticos d'altu cargu.

»Conformóse d'aquella un grupu ñidiamente definíu de funcionarios, nel escalafón más altu de la pirámide alministrativa, estrechamente rellacionaos cola xerarquía política gobernante, conocíu pol ranciu alcuñu de «pates negres», que foi ampliándose y renovándose col tiempu pol sistema de cooptación, los cuales, a la so vegada, conviértense en repartidores de prebendes a un segundu nivel, pente los fucionarios asitiaos nos escalafones inferiores: collaborando cola clas política na escoyeta pa los nomamientos a deu ya provisionales, iguando los tribunales d'oposiciones y prebes d'entrada en xeneral, participando nel negociu de los cursos de formación del personal, etc.

»Afítase per esti camín na Alministración Pública asturiana un sistema de carrera profesional de los emplegaos públicos sofitáu na confianza personal ya nos enchufes, ya dirixíu a algamar un tipu de funconariu cumplimenteru ya sumisu, que ye'l que llega perfechu fasta güei:

» - Los puestos de trabayu de rangu superior son toos de nomamientu dixital y van n'aumentu. Nesta llexislatura, amás de les Xefatures de Serviciu, interventores, etc., el Gobiernu estendió esti sistema estraordinariu de nomemientu por razones de confianza política a más de cuarenta puestos nuevos de «coordinadores», «asesores» o terminoloxía asemeyada, destinaos a desarrollar funciones puramente téuniques que pasen a camudase, d'esta mena, en funciones de confianza política.

» - Los puestos entemedios, como puen ser les xefatures de negociáu y de seición, pente otros, caltiénense cubiertos de mou provisional, allargando fraudulentamente demientres años los nomamientos en «comisión de servicios» previstos llegalmente pa cubrir vacantes por razones d'estraordinaria y urxente necesidá pol plazu tope d'un añu, sin que se convoquen a concursu públicu de méritos eses places, como dispón la llexislación aplicable.

» Pa facese una idega de lo que tamos falando, baste dicir que la Comunidá Autónoma d'Asturies nun resuelve válidamente un concursu de méritos de xefatures de negociáu dende fai más d'ocho años, y el caberu concursu de méritos p'algamar xefatures de seición o puestos asemeyaos, ente ellos, los de lletráu del Serviciu Xurídicu, lleva más de seis años sin convocase.

» - L'usu cada vegada más abultáu de personal interín pa cubrir vacantes de plantilla, incluyíos abondos puestos de xefatures de seición, col amagu del cese ecima'l llombu como «espada de Damocles».

»Fasta el nomamientu de los Direutores Xenerales faise con burlla dafechu de la llei, porque «quitando supuestos individualmente estimaos pol Conseyu de Gobiernu, sedrán (tendríen de ser) designaos pente funcionarios de carrera de cualquiera Alministración, pertenecientes a cuerpos, grupos o escalas nos qe se desixa titulación superior pa poder ingresar», siendo asina que les Direiciones Xenerales del Principáu d'Asturies tán atarricaes de cargos que nin son funconarios nin cosa que s'asemeye.

»Sicasí, la entrada pela puerta trasera a puestos de trabayu nel seutor públicu asturianu fízose posible al traviés de procedimientos más áxiles que la oposición llibre: entrevistes, beques, contratos por obra o serviciu, contratos alministrativos, etc., que permitieron a munchos agraciaos, col pasu del tiempu, finar con un trabayu fitu n'Alministración por mor de rellaciones familiares, amistaes, carnés de partíu o sindicatu o influyencies varies. Too ello, col sofitu y amparamientu de los aparatos sindicales institucionalizaos, que facen equí d'axente empleador d'una estensa cleintela propia.

»Con too y con ello, quiciabes seya nel descomanáu incrementu d'empreses xestionaes con sistemes de Derechu priváu -sociedaes anónimes de titularidá pública: SRR, SRT, SOGEPSA, VIPASA, Valalón, SERPA, GISPASA, Parque de la Prehistoria S.A., Xestión d'Infraestructures Turístiques y Culturales, etc.-, pa fugase de les garantíes qu'impón el Derechu Alministrativu en cuantes a la publicidá, trasparencia y oxetividá de los sistemes d'escoyeta del personal, onde deba buscase ún de los mayores viveros d'emplegu cleintelar na Alministración asturiana nos caberos años.

»Como vien a dicir aceñadamente'l funcionariu ya escritor asturianu Javier García Cellino a propósitu d'unes llacerioses declaraciones del conseyeru de Salú sobre les condiciones de trabayu na sanidá pública, meyor «se dedicara a debatir sobre la política d'emplegu del Partíu Socialista que, n'Asturies, y polo que se refier al ingresu na función pública, tien un récord negativu mui difícil d'igualar en cuanto a casos d'amiguismos, enchufismos y otros «ismos» asemeyaos» (La Nueva España, edición de Les Cuenques, vienres 11 de xineru de 2008)».

Firma: Xabiel Álvarez Villa, xurista. Les Noticies, 10/02/08.

:: ¡Pites, pites...! ::

«Fai unos años un rapaz d'un pueblu de les Cuenques acudió per primer vez a una manifestación pola oficialidá, la qu'entama n'Uviéu la Xunta Pola Defensa de la Llingua anantes del actu institucional de l'Academia nel teatru Campoamor. Al acabar la movilización subió colos collacios, más avezaos a estos rituales, a un palcu del teatru. Despistáu abondo y tovía cola escitación nel cuerpu por tanta reivindicación gayolera, tanta bandera y tantu xaréu de la manifestación, el mozu asturianista, de la que vio que s'alzaba mui seliquín un gran telón y apaecíen nel escenariu, sentaos nuna mesa, unos paisanos mui serios y enfataos que más qu'académicos paecíen banqueros aconceyaos, soltó un gran glayíu que sintióse en tol teatru:

-¡Comeores!.

»Más qu'avergoñaos muertos de risa, los collacios fueron quien a silencialu y sacalu del so error.

»Nun sé que será del rapaz, pero si anguañu-y diere por salir a la cai dando'l mesmu glayíu, nun diba haber naide con razones pa tapa-y la boca nin error nengunu qu'iguar.

»Asturies ye un inmensu comederu. Del Eo a Tinamayor, de Payares a Xixón, esto ye una fartura a la que tamos toos convidaos. Chiringuitos, subvenciones, pautosÉ ¡Será por perres!.

»La transición española tien un finxu cimeru: los Pautos de la Moncloa. Hasta ehí llegó'l puxu de la cai, les güelgones, la presión social, la utopía. La paz social tenía un preciu. Los sindicatos firmaron y, como los animales xabaces, fueron domesticaos. Hasta agora.

»N'Asturies, más, porque esti espectáculu repítese cada cuatro años, anque camuda de nome. El d'esti añu llámase Aceba (Acuerdo para la competitividad, el empleo y el bienestar de Asturias). Los urogallos aliméntense d'acebos y tán en trance d'estinción. A los asturianos danmos de comer l'Aceba, y lo mesmo. Cada día engordamos más, pero tamién tamos n'estinción, pola caída demográfica.

»L'Aceba son tres mil seiscientos noventa y un millones d'euros en cuatro años. A la mesa, pa firmar, siéntense'l Principáu, que convida, los empresarios y los sindicatos. Esto ye la gran fartura, la torna al asturianu de «La grande bouffe», aquella película tan gocha de Marco Ferreri. Ciento tres d'esos millones van pa «formación y empleo», que ye d'onde pillen los sindicatos y la FADE pa financiase.

»Lluegu tán los postres: una subvención pa esti, un contratín p'aquel, un programucu pal otru. Pa la cultura, con eso basta. Los artistes ye lo que tienen, aliméntense cola vanidá y básta-yos con cuatro duros. Ye la política de ¡pites, pites!É la del paisanu espardiendo piensu pel gallineru.

»La paz social ye mui silenciosa. Cola boca enllena nun se fala. Tampoco nun barrena unu la cabeza. Contra la funesta zuna de pensar, la prestosa decisión de xintar. ¡Habrá cosa más guapa que tola familia na mesa, como nes bodes!.

»¡Asturies, qué gran banquete y qué tierra de contrastes: los llicenciaos, a emigrar; y los demás, a comer! Hai cuatro repunantes que nun se quieren sentar na mesa, los mui mazcayos. Nun se sabe ónde xinten. Pero nin los conocemos. Nun salen na semeya al final, cuando los puros y los volaores».

Firma: Xuan Cándano. La Nueva España, 03/02/08.

:: Cuando examen les abeyes ::

«Tira un aire de castañes, a destiempu, que paez que va tremar el terrén d'aricios ensin necesidá que nadie los demia. Xente notable de la nuestra pequeña República de les Lletres amosó últimamente la so cansedá d'una manera inequívoca. Tar cansu ye un estáu personal que nun almite discusión. Y, d'otru llau, siempre se dio ente nosotros una vena xeremiaca d'intensidá fluctuante. Agora, paezme que nada nun vamos sacar d'andar en sollutos, nin pa nenguna sociedá tienen llamamientu les actitúes qu'arrecienden a pesimismu o a derrota.

»Ye posible que'l problema de l'Asturies que queremos, meyor y más xusta, seya una cuestión de númberos, como dicía Víctor Manuel. O el fechu de que, como apuntaba hai poco Lluis Xabel Álvarez, nun tengamos envergadura, sinón envergablanda. Pero lo poco y lo muncho son asuntos relativos; y la mesma naturaleza fai que les envergablandes se volvian envergadures cuando la ocasión lo merez. Pa min que ye más aína una cuestión de sintase: Asturies ye una oración con sintase deficiente, onde'l suxetu fai de complementu circunstancial y onde'l verbu nun se topa nenyuri. Una oración asina nun espresa nengún estáu nin nenguna acción, nun ye comprensible. Y, efectivamente, la mayoría de la xente nun ye a comprendela, por más que ta tan avezada a oyela que-y paez adivinar dalgún sentíu, inclusive profundu. Asina les coses, paez que lo que se sigue ye evidente: la oración gramatical que ye Asturies tendrá que s'espresar con sintase, lésicu y morfoloxía correctes. Pa que tol mundu la entendia.

»Cuando entamó'l Surdimientu, quixemos facer comprensible la oración, dotala del so suxetu y del so verbu, colocar los complementos circunstanciales nel so llugar propiu. Pero'l nuestru conocimientu sintácticu nun diba mui allá y saliónos un enunciáu daqué revesosu, daqué inconsistente, un poco pueril. Y sicasí, la necesidá d'una espresión comprensible yera tala, que la nueva oración empezó a entendese. Por eso, esa nave na que nos embarquemos daquella, pesie al so rumbu erráticu, pesie a too, avanzó. El güelpe de timón de la I Xunta d'Escritores púnxola nel rumbu correctu y sentó nos bancos a los meyores remeros. Agora paez que los remeros tán cansos y sienten la tentación de dexar la nave al debalu, al sabor del corriente.

»Va poco facía Xuan Bello una distinción pertinente ente Lliteratura y Sistema Lliterariu. Y calificaba de fracasu'l recorríu pel nuevu rumbu que tomemos na Xunta d'Escritores mientada enantes. Vaiga per delantre que yo nun considero los resultaos un fracasu, sinón una etapa frutiega que se cumplió: nunes coses túvose ésitu y n'otres non. Garrar el rumbu adecuáu foi, ensin duldar, un ésitu en xunto. Bastará con acordase de cómo tábemos a pique de naufragar. Facer de la llingua asturiana un instrumentu válidu, capaz y flesible, civilizáu, foi otru ésitu. Consiguir qu'esa mesma llingua fora, cada vez más, parte del sentimientu d'identidá consciente de tolos asturianos, foi tamién un ésitu. Poco que seya, hai que reconocer que la llingua asturiana avanzó a posiciones de más centralidá dende la situación de marxinalidá na que taba. L'asturianu ye, agora, más llingua de comunicación pública y más llingua d'identificación de los asturianos, más instrumentu común y menos arma de politización partidista. Y digo llingua, non patués étnico-folclóricu. Finalmente, biltó -tímida, débil- una manera de ver y espresar el mundu propia, sustantiva, non adxetiva nin circunstancial. Lo demás, ciertamente, habrá que lo poner na cuenta de los gastos: los cantíos de Sirenes que a toos nos encantexen, poco o muncho; les Circes que nos prometen paraísos y acaben trancándonos nuna corripa; los lestrígones caníbales, de los qu'hai tantos ente nosotros; les vanidaes, los prexuicios, les actitúes suicides de los que piden reinos que nun son d'esti mundu. Pero'l nuestru problema fundamental ye decidir si esti ye'l llímite, si vamos conformanos y permitir que nos pongan definitivamente una allendadora y nos mantengan acorripiaos nel llugar onde fuimos a llegar. Ye una decisión nuestra. Y na mio opinión, al que quier avanzar nu'hai allambre que lu llindie.

»Nun hai realmente casi nada d'un Sistema Lliterariu Asturianu como Xuan Bello lu define. Casi nada. Pero esi casi tamién cuenta. Y nun lu pue haber, porque esi Sistema nun depende mayormente d'una lliteratura bona o mala, sinón de la esistencia d'una cultura estructurada como espresión d'una comunidá, d'un país. Y de los instrumentos d'esa estructura: escolarización, medios de comunicación, conciencia d'identidá común de la sociedá, polítiques de sofitu, valorización y prestixu... Poco hai d'eso n'Asturies, casi nada. Y esi ye'l nuedu de la cuestión asturiana: la dicotomía ente provincia / país. Una provincia nun tien esa estructuración; un país, sí. Y nosotros, los asturianos, tamos aballando ente una posición y la otra. Y los asturianistes, tamos aballando ente quedanos na nuestra xaulina o abrinos a la sociedá con tola fuercia posible, con toles posibilidaes d'incidir nella, d'informala y de convencela. Y con toles consecuencies. A min paezme que nesti momentu yá toca facelo ensin complexu nengún, pero con sencia: ye, creo yo, nes circunstancies d'anguaño, l'únicu camín abiertu que lleva a la meta que nos propunxemos.

»Falé de país, arremente: una palabra d'amplitú semántica suficiente y comprensiva, na que creo que podemos alcontranos toos: los que creen qu'esi país -Asturies- ye una rexón, los que creen que ye una nación, los que tienen a esgaya con llamalu comunidá autónoma. Podemos alcontranos toos ehí; toos menos los qu'aspiren a una categoría provincial pa Asturies, aquellos que propicien una Asturies convertida nun meru departamentu administrativu: nuna provincia. Hai políticos qu'aspiren a eso, a la provincialidá; pero escurque hai otros que perciben esta tierra como país. Hora ye de qu'estos políticos dexen atrás los sos complexos y actúen como lo que son, como políticos, con idees, con proxectos, con responsabilidá. Va de so qu'una acción política que frene'l declive xeneral d'esti país nun ye asuntu que competia namás a aquellos que defenden los derechos llingüísticos de los asturianofalantes. La resolución de la cuestión llingüística ye solo un aspectu más de la percepción d'Asturies como país. Tanto ye así, que la esistencia d'esti problema concretu n'Asturies, contra lo que pasa nel restu d'España, ye únicamenente'l resultáu de la voluntá d'unos cuantos políticos de la provincialidá. Ellos crearon un problema al conculcar unos derechos. Como resultáu, Asturies ye l"únicu llugar d'España onde continúa, no llingüístico, l'estáu de coses del franquismu, edulcoráu pero sensiblemente'l mesmu. Vese claro que vivir güei n'España con una percepción provincial ye aceptar ser un individu minorizáu, un simple administráu. Pero que nun s'engañe nadie: esa percepción provincial de los nuestros gobernantes afecta tolos estratos de la vida colectiva y individual, desde'l trabayu a l'ociu y desde la guardería a la cultura. Y cuando s'acabe'l maná, vamos topanos nuna situación de notable indefensión, si prospera esi proxectu de l'Asturies provincial.

»Quede claro qu'esti país billingüe se constrúi tanto en castellanu, como n'asturianu, como nel gallegu d'Asturies. Hai conculcación de derechos llingüísticos n'Asturies, pero nenguna falta de cohesión na sociedá por motivu de llingua: toos somos asturianos, toos sociedá asturiana, toos el país. La contribución al nuestru futuru vien de tolos llaos y en toles llingües territoriales d'esti país. Nun pue ser d'otra manera nin debe de ser d'otra manera. Demasiao tiempu yá la cultura asturiana que s'espresa n'asturianu entró nel camín de considerase a sí mesma, na práctica, un meru subsistema, una cultura subsidiaria. Falsa percepción, puru complexu. Esi ye un camín que lleva ensin vuelta a la reserva, al ghetto, a la pura ritualidá, a la inoperancia. Convendrá pensar y afirmar con palabres y con fechos, con tenacidá y con eficacia, que la llingua asturiana, la cultura asturiana que s'espresa nesa llingua, son parte del sistema, parte fundamental del sistema que constitúi la sociedá asturiana. El camín del marxe a la centralidá yá viemos que ye revesosu; pero ye l'únicu. Acabada la etapa qu'arrancó na I Xunta d'Escritores, nun queda sinón siguir adelantre. Y ye obvio per ónde siguir: la cooficialidá, de verdá, non como eslogan ritual. Tamos meyor preparaos que nunca, tamos preparaos, simplente, pa encarar esi retu con solvencia. Pero hai que salir del ghetto definitivamente y con determín. Informar, proponer,convencer. Sin descansu, con firmeza; pero con prudencia, con respetu, con percuru. Y ensin complexos. Demasies veces, aquel que cree tener del so llau la razón y la xusticia piensa que los demás van ver y aceptar esa razón y esa xusticia de manera automática. Y cuando nun pasa así, conviértese él mesmu nun adorador solipsista de la so propia pureza o nun individu frustráu. Nun pue ser esi'l métodu d'aunir voluntaes. Nin tampoco el reburdiar continu, la quexa enritada, el fustacar na mancadura. La llingua asturiana, como toles llingües, proporciona placer, cultura, riqueza, allegría al que la usa y la conoz. Ye un regalu, non una carga. Una allegría, non un sufrimientu. A nosotros correspuéndenos tresmitir esa allegría, esa riqueza, esi placer, a toos, a los que la falen davezu y a los que non. Eso nun quita un ris a la firmeza na reivindicación; polo contrario, afírmala.

»Quixera saber si nosotros, los asturianistes, o los que seyan, los que percibimos Asturies como país, seremos capaces d'entamar esi gran desembarcu na sociedá asturiana, la nuestra gran asignatura pendiente. Porque ensin la sociedá asturiana, nada nun vamos facer. Nós, qu'organizamos Xuntes d'Escritores, premios lliterarios, conciertos, Congresos de llingua o de lliteratura, programes televisivos, asociaciones culturales...¿seremos quién a organizanos toos, de manera total, ensin canibalismos, col obxetivu claru y común d'esplicar qué significa la cooficialidá de llingües a los ciudadanos d'Asturies? ¿Seremos quién a organizar un Debate continuáu y públicu, un Congresu sobre la Cooficialidá, ensin restricciones, endrezáu a los que piensen uno y a los que piensen otro, a los favoratibles y a los contrarios?. Porque'l primer pasu tenemos que dalu nosotros. Ata'l momentu, coláronnos bien de goles los amantes de la provincia. En ficies d'ellos, la cooficialidá de llingües significa imposición, agresión, gastu, mesmamente separatismu. Eso ye lo que llega a los ciudadanos d'Asturies, esa ye la so información más machaconamente repetida. El gobiernu mesmu yá se curó en salú pol conocíu procedimientu de recurrir al dictame d'una «comisión amiga». Al mio entender, toos esos actos esixen una respuesta común, continuada, repetida, ensin posa. Y nun se trata simplemente d'esplicar los derechos llingüísticos. Hai que algamar, yá mesmo, unes conclusiones que permitian al ciudadanu salir del terrén de l'abstracción y saber qué significa la cooficialidá de llingües nel modelu concretu d'Asturies. Cuál ye concretamente'l modelu de cooficialidá que proponemos. Nun se trata de redactar la llei. Pero sí d'allonxar eses fantames que difunde'l poder provincial, eses comparances vagues con modelos llingüísticos que nun tienen por qué ser el nuestru, eses gordes mentires que faen tan difícil el diálogu seriu y serenu. Porque tenemos qu'apelar a la sociedá y pa ello la sociedá tien que saber. La cuestión de la cooficialidá de la llingua asturiana nun ye asuntu que puea ventilar nenguna comisión d'espertos. La situación ye tala como pa echar tola carne na pota. ¿Seremos, entós, capaces de llevar adelantre un procesu común, toos y cadún, toles organizaciones? Non tal o cual actu: un procesu común, masivu, organizáu, intensu, continuu, serenu. ¿O vamos sentanos a lloramicar y a llamber les encetadures? Non, nun podemos abandonar el campu antes qu'acabe'l partíu. Nin llimitanos a dar unes patadines. Hai que xugar. Y hai que xugar pa ganar».

Firma: Xosé Gago. Les Noticies, 31/01/08.