:: Ensin reivindicar nada ::

«Tamos equí, en Béziers, esti sábadu 17 de marzu, con otra xente, pa dicir y amosar la nuestra allegría: la d'interesamos pola llingua y la cultura occitanes. Llingua / cultura occitana que, pola so situación y la so historia complexa mos obligó a reflexonar sobre lo que ye una llingua y una cultura y a deprender una historia de Francia diferente de la que mos cuenten; lo que mos llevó a pensar na historia en xeneral y mos dio la ferramienta pa entender meyor el mundu.

»Mos abrió a les otres llingues llatines, a les llingües maltrataes; lo qu'acabó por llevamos a reflexonar sobre les llingües, les cultures y los pueblos del mundu enteru.

»Mos dio una posición y una estratexa pa repensar y tresformar Francia: gracies a ella sabemos qu'afondar na democracia pasa pela descentralización y la pluralidá culturales.

»Mos ofreció un vastu campu d'esperiencies (musicales, lliteraries, cíviques, sociales ...).

»Fixo de nosotros, en resume, pioneros de los tiempos modernos, esos nos que vivimos.

»¡Nun Reivindicamos nada!.

»Nun reivindicamos nada porque naide mos puede “dar” esa allegría y esa intelixencia que fabriquemos solos, na llucha, contra les ideoloxíes dominantes.

»Nun reivindicamos nada porque cola llingua y la cultura occitanes y cola esperiencia de la llucha tenemos tolo que mos fae falta pa siguir siendo esos pioneros.

»Y nun reivindicamos nada porque somos nosotros los que tenemos que dar: da-y al pueblu que tanto mos deprendió y al públicu más llargu, les obres que merez. Porque ye con obres de toa mena (incluyendo les manifestaciones d'allegría) colo que vamos convencer a esi públicu de venir a comprtir con nosotros lo que tamos viviendo: la más guapa y fecunda aventura intelectual que se pueda vivir nestos tiempos. Y taivos seguros qu'esi públicu va saber obligar a los poderes políticos a facer lo que deben».

Declaración de Béziers, 17/03/07. En: Lletres, Foru de Llingua y Lliteratura Asturiana.

Que nesti 2008, seyamos quiénes pa seguir afitándonos firmes na nuesa particular, allegre y fecunda aventura intelectual; l'aventura intelectual más guapa qu'alma nacida dala pudiere vivir nestos tiempos. Tamién equí, n'Asturies...