:: Derrota ::
Cuido que foi Noam Chomsky el que dixo que la única desemeyanza esistente ente una llingua y un dialectu ye que les primeres son falaes en países que tienen exércitu y los segundos son falaos en países que nun tienen exércitu.
A la mio llingua materna, l'asturianu, el Conseyu d'Universidaes y la Ilustre Ministra d'Educación y Cultura d'un Gobiernu espannol que se diz aprendiz de centrista, anecien en negá-y la propia calidá de llingua, tapeciéndose tres de supuestes razones pseudo científico-xurídiques: nun ye una "llingua oficial". Destamiente -sigún la so propia y alloriada argumentación-, nun ye dable el so estudiu nuna Universidá supuestamente autónoma y con supuesta reconocencia científica como la d'Uviéu, que ye quien reclama esos mesmos estudios y na que s'estudien llingues tan poco oficiales n'Espanna como l'árabe, el llatín, el griegu clásicu o l'inglés. El centru-derecha, los socialdemócratas y los nacionalistas, toos aplauden. Esta autoproclamada nueva castra de necios ya incultos xueguen al hipócrita xuegu de la progresía deletreando les lletres de los mesmos DDHH que-yos nieguen a la xente a la que dicen servir.
Al empar, esos mesmos necios perpetren un Estatutu d'Autonomía que carga de cadenes a un pueblu enaxenáu que, no más fondero de la so actual degradación moral, nin siquier ye quién pa remembrar les dómines non tan llonxanes nes que entá yera celosu de la so llibertá, idealista, solidariu ya intrépidu. Nel mio país, Asturies, les persones sensibles asisten impotentes a estos continos atropellos por parte de los que tan instalaos nel cumal del poder, enllordiaos nos sos propios detritos. Miren de ver eses decisiones dende los prismes de la razón y de la cultura. Pero enquivóquense. Too eso nun son otro que decisiones polítiques y, poro, fíes de los más asquerosos y puercos intereses. Hai yá abondo tiempu qu'Occidente abandonó el cultu a la diosa razón pa echase en brazos del becerru d'oru. Anguannu, lo que cuenta ye'l númberu de votos, non les idees. Anguannu, la xente yá nun somos tal, somos sólo consumidores.
Nel mio país, Asturies, nun hai exércitos y tampoco nun hai grandes intereses. Pocos votos y pocos consumidores. Un pequeñu y mísere país perdíu ente los montes, allá nos confines de los borrinosos Finisterres Atlánticos de la vieya Europa. Un país que, a la fin, galdíu yá de la so épica llucha milenaria, decidió claudicar. Un país cuyo primer indicu de darrota foi'l permitir la violación y el saquéu de la so propia llingua: lleváronse perllonne les sos palabres húmides y guapes como perles de rosada al otru llau los montes, cola pretensión inútil d'encerrales nes frasques de formol d'un llibru gordu y polvorientu nomáu DRAE. Un país patéticu que, desarmáu y degradáu, mendiga agora unos fondos europeos, llorimiacando coles manes estendíes y les rodíes afincaes na tierra llento, en sin ser entá quién p'aceutar la so derrota: terrible, total, definitiva. Un país que reburdia palabres de remordimientu nún dialectu risible que yá a naide importa. Un país aú sigue lloviendo y aú yá ye abondo tarde pa más nada.
Cuido que foi Noam Chomsky el que dixo que la única desemeyanza esistente ente una llingua y un dialectu ye que les primeres son falaes en países que tienen exércitu y los segundos son falaos en países que nun tienen exércitu.
A la mio llingua materna, l'asturianu, el Conseyu d'Universidaes y la Ilustre Ministra d'Educación y Cultura d'un Gobiernu espannol que se diz aprendiz de centrista, anecien en negá-y la propia calidá de llingua, tapeciéndose tres de supuestes razones pseudo científico-xurídiques: nun ye una "llingua oficial". Destamiente -sigún la so propia y alloriada argumentación-, nun ye dable el so estudiu nuna Universidá supuestamente autónoma y con supuesta reconocencia científica como la d'Uviéu, que ye quien reclama esos mesmos estudios y na que s'estudien llingues tan poco oficiales n'Espanna como l'árabe, el llatín, el griegu clásicu o l'inglés. El centru-derecha, los socialdemócratas y los nacionalistas, toos aplauden. Esta autoproclamada nueva castra de necios ya incultos xueguen al hipócrita xuegu de la progresía deletreando les lletres de los mesmos DDHH que-yos nieguen a la xente a la que dicen servir.
Al empar, esos mesmos necios perpetren un Estatutu d'Autonomía que carga de cadenes a un pueblu enaxenáu que, no más fondero de la so actual degradación moral, nin siquier ye quién pa remembrar les dómines non tan llonxanes nes que entá yera celosu de la so llibertá, idealista, solidariu ya intrépidu. Nel mio país, Asturies, les persones sensibles asisten impotentes a estos continos atropellos por parte de los que tan instalaos nel cumal del poder, enllordiaos nos sos propios detritos. Miren de ver eses decisiones dende los prismes de la razón y de la cultura. Pero enquivóquense. Too eso nun son otro que decisiones polítiques y, poro, fíes de los más asquerosos y puercos intereses. Hai yá abondo tiempu qu'Occidente abandonó el cultu a la diosa razón pa echase en brazos del becerru d'oru. Anguannu, lo que cuenta ye'l númberu de votos, non les idees. Anguannu, la xente yá nun somos tal, somos sólo consumidores.
Nel mio país, Asturies, nun hai exércitos y tampoco nun hai grandes intereses. Pocos votos y pocos consumidores. Un pequeñu y mísere país perdíu ente los montes, allá nos confines de los borrinosos Finisterres Atlánticos de la vieya Europa. Un país que, a la fin, galdíu yá de la so épica llucha milenaria, decidió claudicar. Un país cuyo primer indicu de darrota foi'l permitir la violación y el saquéu de la so propia llingua: lleváronse perllonne les sos palabres húmides y guapes como perles de rosada al otru llau los montes, cola pretensión inútil d'encerrales nes frasques de formol d'un llibru gordu y polvorientu nomáu DRAE. Un país patéticu que, desarmáu y degradáu, mendiga agora unos fondos europeos, llorimiacando coles manes estendíes y les rodíes afincaes na tierra llento, en sin ser entá quién p'aceutar la so derrota: terrible, total, definitiva. Un país que reburdia palabres de remordimientu nún dialectu risible que yá a naide importa. Un país aú sigue lloviendo y aú yá ye abondo tarde pa más nada.