:: Secuestradores y sicarios ::

El Real Institutu d’Estudios Asturianos (RIDEA) ye, dende los sos escuros anicios franquistes –como diz Sixto Cortina nesti artículu-, «un proyectu destináu a trancar nuna urna de cristal a Asturies, la so llingua y, en xeneral, “lo asturiano”, pa caltenela, con respiración asistida, fuera del so mediu natural, y evitar asina que medrara y se fixera mayor».

Nesti país caltiénense secuestraos los mecanismos culturales dende hai yá bien de tiempu. Esta evidencia rescampla n’actividá compulsivo, obsceno, reiterativo y cíclico de los babayos servidores de la cultura oficial; esos supremacistes qu’actúen davezu como sicarios del poder absolutu que reina nesti país de comedia: el rellumante coriféu de combayones fartos de sí mesmos, incluyía una casposa y vieya reciella franquista, agora diz que tresmutada n’ánxeles de la democracia lliberal ensin tacha dala. Unos y otros xente bien de tola vida, quier dicise. Y al ñeru podre au guaña’l poder vien-y bien cebar con procuru a esa banda de sicarios. Ye, como dicía aquél, el toma y daca.

Estos sicarios, por mandáu del secuestrador qu’asina-yos lo manda facer, dedíquense aplicaos a la rentable actividá de caltener n’estáu de muerte suspendida y de perda de llibertá a la cultura d’esti país. Falen en términos absolutos –son depositarios de la Verdá-, que pa dalgo son Catedralgos d’Universidá ya inteleutuales vieyos. Y actúen al marxe de la llegalidá y del Estáu de Derechu, al despreciar y facer de menos el llabor de normativización encamentáu pol Poder Executivu a una Institución como l’Academia de la Llingua Asturiana. Los sicarios actúen amparaos na más absoluta de les impunidaes, bien guardaos al abeyu los secuestradores que los tienen a sueldu.

Esa muerte suspendida -l’angustia que carauteriza’l secuestru-, viola de contino la integridá moral de miles d’asturianos y supón una arbitraria ya inxusta perda de llibertá pa ún seutor de la nuesa sociedá civil; esos mesmos ciudadanos falantes d’asturianu a los que se mos caltién minorizaos nel exercicu los nuesos derechos y llibertaes.

Sábese que’l secuestru amedrana a los secuestraos y a quienes-yos son más prósimos, desorienta y provoca inaición y un sentimientu d’impotencia nos ciudadanos. Pero tamién tien un efeutu más perversu si cabe: el síndrome d’Estocolmu ye un estáu sicolóxicu nel que les víctimes del secuestru, desendolquen una relación de complicidá colos sos secuestradores; davezu, los prisioneros acaben aidando a los sos captores a algamar les sos fines.

Pero nun mos podemos engañar. La cultura nun ye lo que mos dicen los nuestros secuestradores. La cultura ye memoria y ye conocencia. La cultura fai posible que la xente s’afite sólido y seya quién p’atopar rempuestes y referencies que-y permitan xorrecer nesta vida. La cultura ye lluz y la lluz alienda la llibertá. Poro, la cultura ye muncho bien peligroso. Los usurpadores de la memoria qu’ocupen los cimeros nichos institucionales d’Asturies sábenlo mui guapo. Por eso anecien n’afondar nel procesu d’aculturación y estandarización –universalización, dicen- de los patrones culturales d’esti país recurriendo al secuestru.

Asturies n’ayén y secuestrada. Amenorgada. Francía. Rota. Escuartizada a manos de los sos propios fíos -verdugos y víctimes al empar-, secuestraos en manos d’unos sicarios que cumplen lleales col mandáu de los secuestradores que los caltienen bien cebaos a base de llavaza. ¿Ye dable calificar de verdaderamente democrática una sociedá asina articulada?. ¿Aportaremos dacuando los ciudadanos que poblamos esti requexu a ocupar el sitiu que mos correspuende dientro d’esa órbita cultural europea que representen les democracies occidentales?.