:: Consultes ::

«El Conseyu Consultivu espresó una montonera opiniones sobre un tema que siento de manera direuta: la llingua asturiana. Como´l so presidente diz que nun lu entendimos y como ye un Conseyu Consultivu voi face-y una riestra de consultes: ¿Por qué dan opiniones llingüístiques siendo xuristes?. ¿Cuántos llibros de llingüística lleeron?. ¿Si l´asturianu nun ye una «realidá tanxible» qué ye lo qu´oyo tolos díes?. ¿Si l´asturianu nun ye una «realidá tanxible» en qué falo yo?. ¿En qué falen los del mio puelu?. ¿En qué ta escrita esta carta?. ¿?. ¿Si nun son sociólogos por qué opinen de socioloxía ensin citar a naide?. ¿En qué parte de les encuestes del SADEI se sofiten pa duldar de la realidá del asturianu y de la demanda de la so reconocencia por parte de la sociedá asturiana?. ¿Por qué los falantes d´asturianu nun cabemos nes lleis del Principáu?. ¿Por qué puedo llicenciame en Catalán o Árabe y non n´Asturianu?. ¿Cuántes caleyes anduvieren coles oreyes abiertes?. ¿Cuánto y quién-yos pagó pol dictame?. ¿Por qué ún de Burela fala una llingua y yo una «realidad de discutible entidad tangible»?. ¿Por qué´l que quier usar catalán pue y el que quier usar l´asturianu non?. ¿«nit», «escola», «txistu» son pallabres más importantes que fueu, ñeru o ñocla?. ¿Por qué tolos/es ciudadanos/es del Estáu tenemos que contribuyir pa que se siga diciendo «foc», «ninot» y «rebaixas» y non pa que se siga diciendo páxaru, ferver o piescu?. ¿Ye caro que l´Estáu pague pola escolarización del catalán o del gallegu?. ¿Podemos permitimos los/es asturianos/es pagar impuestos pa que s´escolaricen eses llingües, pero ye caro escolarizar la nuesa?. ¿Qué esclúi a Asturies de la Constitución, la Declaración de Drechos Humanos o la Carta Europea de les Llingües Minoritaries?. ¿Nun lleeron los señores del Conseyu Consultivu les recomendaciones del Conceyu de les Llingües Amenazaes p´Asturies?. ¿Taben d´espicha cuando visitaron Asturies y nun lleeron lo que recomendaron pal asturianu?. ¿Pa exercer un drechu fundamental hai que ser mayoría?. ¿Dende cuándo la historia del non reconocimientu d´un drechu xustifica que nun se lu considere?. ¿La hestoria del apartheid fadría esti daqué inevitable «per secula»?. ¿En qué Facultá de Drechu enseñen que les lleis son inmutables?. ¿Por qué la demanda de que l´asturianu seya oficial ye problemática y la testeronería en nun lo reconocer, non?. ¿Por qué les iniciatives pa intentar dignificar l´asturianu nun les tienen en cuenta, pero sí les critiques a esa demanda?. ¿Por qué les intervenciones parllamentaries escontra l´asturianu les consideren de más valir qu´una llei del Principáu?. ¿Quién los llexitimó pa criticar la llei d´Usu del Asturianu?. ¿Visitaron dacuando la sede de l´Academia de la Llingua Asturiana?. ¿Aconceyaron dalguna vez col profesoráu de Llingua Asturiana?. ¿Tienen una güela de puelu?. ¿Mancháronse dalguna vez de cuchu, fueron a ñeros, atroparon yerba dacuando, pincháronse con un escayu, metieron frebes para sacar grillos del furacu, xubieron pela tenovia d´un horru, comieron oricios, xiblaron una canción, respigáronse cola gaita, tastiaron un culete, mexaron dempués d´una espicha, fartucáronse de fabes...?. ¿Tienen cuayu?. ¿Son asturianos?. ¿Nun lo piensen antes de defender el drechu de catalanes, vascos, navarros, gallegos, valencianos, baleares a falar les sos llingües y criticar a los sos vecinos asturianos por pretender nun ser menos?. Y una cabera pregunta, esta pa los políticos asturianos: ¿de verdá van tener el cuayu de faer un nuevu Estatutu p´Asturies dexando otra vegada fuera a la parte de la sociedá asturiana que quier usar la llingua d´Asturies?».

Firma: Xosé Firmu García Cosío, La Pola Siero. En LNE, 25/07/06.