:: Naide ::

¿Podeis oirme? Quiero ser honesto con vosotros. Yo ODIO este dialecto, este bable, esta lengua, o como queráis llamarla. No puedo seguir oyéndola por más tiempo. Quizás sean los "ye", si es que existe tal cosa. Me siento saturado por ella. Puedo sentir su presencia. Y en todo momento siento como si de alguna manera me hubiera infectado. Es repulsiva. Tengo que acabar con ella, tengo que dejar de oirla, y en los bablistas esta la clave, mi clave. Una vez que los bablistas hayan desaparecido no habra necesidad de seguir guardando las apariencias, ¿no lo entendeis? Necesito que dejéis de hablarla, y vais a dejar de hablarla. Vais a dejarla o vais a morir.

Vicente Álvarez Areces, en plan “Matrix” (parodia d'un foreru anónimu, perende...)

Hai una escena na película “Matrix” na que l’axente Smith, enfrentáu a Morfeo, cúspe-y lo fartu que ta de la so misión y el despreciu fondu que tien pa colos seres humanos. Neto que’l nuesu particular establishment y los nuesos gobernantes -emprimando pol propiu Presidente autonómicu-, Smith nun dulda en trespasar les llendes escures del odiu xabaz ya irracional por too aquello que fieda a humano, a asturiano... el fiel amárga-yos na boca y tínta-yos de verde’l so dentame, n’especial cuando lladren el so odiu ensin fin pa con esti humilde idioma.

Como Smith, visten traxes perfechos y miren d’espeyar una mena de perurbana pulcritú nos escuros espeyos les sos ánimes: autoproclámense “demócrates”, “progresistes”, “defensores de la xusticia social”. Asturies pa toos ellos nun ye más qu’una cáscara valera. Un territoriu. Un caldarucu de mierda cada vuelta más escosu, onde furar colos sos caniles torcíos y llamber el sangre los sos ruinos recursos naturales, culturales, humanos. Un escenariu nel que representar les sos combayances. Una pota noxenta au cocer les sos rensíes, cópules y trafullos. Son depredadores a los que nun-yos importó nunca res la memoria los muertos, les voces de los que nunca nun tuvieron tal, la dignidá humano y fondo d’esta cultura antigua... individuos tan escaecíos de la so condición humana que nun saben yá qué significancia pudiera tener la palabra respetu, a cencielles. ¿Qué va respetar un depredador que xustifica la so esistencia na sola llucha pola sustitución d’otros depredadores nuna determinada pirámide socio-ecolóxica?.

Agora, mirái pa los sos penosos esfuerzos por xustificar lo que nun tien xustificación dala. Mirái pa esti desfile de sabios, esta ristra d’espertos bien fartucos de sigo mesmos –el que somatizaba’l so odiu pa cola mio cultura diciendo que-y daba voltures el “bable normalizado” ye nada menos que’l Presidente del recién creáu “Conseyu Consultivu del Principáu d’Asturies” y ún de los artífices xurídicos d’esta Comunidá Autónoma-; atiende pa los padres d’esta parodia, los xastres d’esti Rei Desnudu, la intelligentzia d’esta rellumante, xusta y moderna democracia; atiende pa toos estos rigurosos ya intachables xuristes diciendo coses como éstes:

«La llingua no le importa a nadie. La prueba es que la inmensa mayoría de los representantes de los asturianos en la Junta no incluyen en su programa la cooficialidad. Preséntense a las elecciones los que hablan de cooficialidad y verán cuántos votos sacan. No nos vendan una moto que no existe. La llingua no debe ocupar ningún papel en la reforma». Ramón Punset en “El Comercio Digital”. Domingu, 9 d’ochobre de 2005.

Valiente doctrina. Valiente argumentación xurídica. A mí sí que m’importen eses coses. La llingua sí m’importa. Va esti y diz que yo nun soi naide. Naide. L’odiu, la miseria, la inorancia y el despreciu que abelluga esta xente ye tanto, que nun son más que pa esbabayar negándome, non yá la mio simple condición de ser humanu, sinón la mio propia esistencia como ser vivu. Defínenme pa negame dafecho. Yo soi Naide. Dizlo un Catedralgu. Un Demócrata. Un Constitucionalista. Un Sabiu. Dizlo'l mio profesor de Derechu Constitucional.

Yo nun soi nada de too eso. Soi naide. A vegaes cuido que nun voi ser yá quién p’argumentar nin pa razonar más nada con xente empapizao nel odiu y el despreciu más espesos. A vegaes siéntome galdíu. Frayáu. Fartu. Seique nesta cubil fedionda, manda’l que la tien más grande: la pistola, la cartera o la cara. Y yo soi naide. Serélo, guapamente. Naide. Pero persabéi que nun voi dexar de falar esta llingua de nadie, malpenes sólo tenga yá fuerces p'abellugame, esmuciéndome adulces pente la borrina d’estos montes, xuxuriando los versos que m’enllenen el alma: «ámovos, palabres / xiblu que me peslláis los llabios...».