:: Extra placentae: Ast 2.0 ::

Nun va muncho nesti artículu, l’escritor Pablo Antón Marín Estrada remembraba una entrevista que tuviera con Manuel Asur nuna sidrería d’Uviéu. Nesi alcuentru, Manuel Asur confesó-y a Pablo Antón que dexara d’escribir n’asturianu nel intre en que se vio fuera la placenta: «”Dexé d'escribir n'asturiano porque rompióse la placenta onde yo me sentía gustosu pa facelo". La placenta yera'l fervor común d'un movimientu popular qu'allampiaba pola restauración de les llibertaes democrátiques y el remanecer de la identidá asturiana (...) Asur referíase a qu'hubo un tiempu nel que se sentía parte de dalgo propio, un trabayu colectivu qu'abellugaba a tolos que contribuíen nél con una placenta de solidaridá. Nel momentu qu'esa placenta rompió el poeta Manuel Asur sintióse fuera, albintestate, ensin otru destín que'l de marchar llonxe, alluende, inda fuere al cobiyu del monte cercanu, a vivir un destín de ser el que s'escuende na biesca porque n'aldea, na villa, na ciudá, cuerren los llobos peles cais y namás la vida a monte ufierta un rebiyu de l'antigu calor de la placenta».

L’artículu espeya a les clares l’ánimu d’abondos ciudadanos y ciudadanes qu’entá formamos parte d’esta pequeña república astur, amatagada y podre ab initio y ex profeso, dende qu’entamara a alendar neses dómines placentaries que tan gráfico remembraba Manuel Asur naquella entrevista. Civitas esta -¿seremos quiénes pa denomala asina?- apoderada definitivo pola peste, como una Florencia de 1348. L’aire engafentao qu’avezamos a respirar d’entós p’acá, máncanos yá muncho bien los polmones a tolos silicosos morales qu’entá tenemos dalgo de fuelle pa mirar d’espresanos nesta llingua.

Nun quiero enganchame al tremor de los viérbenes que s’entretienen en llorimiagar, mordese o reburdiar, sigún el casu, énte los caberos -y pa nada sorprendentes- resultaos eleutorales n’Asturies. Tampoco nun quiero siguir dando-y vueltes a la sisífica maldición que diz qu’arrecostina tou asturianista siquier a medies concienciáu: nun m’esmolecen pa nada les recompenses celestiales o los castigos infernales de la fin del mundu allá pa escontra l’añu (eleutoral) de 2011... A mí esmolezme’l día a día, cada segundu, la llibertá qu’alienda en cada pasu que damos, l’asunción de les consecuencies de cada actu propio.

Como diz nesta entrada González y González, si a los mexicanos-yos costó entamar a derromper col círculu viciosu más de 70 años, ¿que nun va pasar nesta Asturies col nuesu PRI particular?.

Énte la evidencia, una vuelta más, del eternu fracasu al que ta condergada equí cualisquier propuesta política de calter dafechu asturianu; esto ye, el fracasu de cualisquier propuesta de participación política al traviés del sistema de partíos entamada en ex novo en clave asturiana. El calter minoritariu -cuando non dafecho residual-, d’una determinada visión “a l’asturiana” de les coses, rescampla otra vuelta más con doliosa evidencia nesta sociedá, que seique yá nunca nun va tener el mínimu pesu demográficu y económicu que-y permita articulase a sigo mesma de forma complexa –esto ye, avanzada-; una articulación conformada por una masa crítica socio-económica inexistente pa nós metanes d’esti mundu globalizáu y bien estremada d’esti inmensu, mísere y anodín comederu públicu en que mos convirtieron/convertimos.

Pero’l poder de los númberos nun pue ser quién pa reducinos, a los qu’entá falamos nesti idioma, a meros residuos sociales más o menos averaos a la estinción. Eso ye lo que lleven lladrando y polo que lleven naguando de magar trenta años los sabios constitucionalistes que diseñaron y caltienen l’artificiosa estructura xurídico-pública d’esta nueva Asturies escaecida de sigo mesma. Y eso ye lo que repite d’entós p’acá -mirando d’imponelo a güelpe d’eslogan “comunicacional”-, la ruina intelligentzia decontructivista del aparatu partitocráticu asturianu, entregada dafecho al lúdicu y bien rentable llabor de desfacer un país pa construir una región.

Asina les coses, la tentación d’enfilar pelos carreros del monte pa desuminos nel silenciu la borrina tira muncho. Y el camientu espresáu por Pablo Antón Marín Estrada énte l’alcordanza de Manuel Asur, yá entama a ser recurrente en bien de nós: a la hostilidá d’un entornu domináu por mediocres depredadores provincianos -educaos toos ellos nes más pures esencies autocrátiques del más ranciu nacional-catolicismu-, habemos sumar los surrealistes ataques vinientes de los panfleteros viérbenes que compraten con nós esti últimu reductu d’aquel universu que fuera quién, mentantu más de milenta años, a da-y vida a esta llingua.

Una fesoria val lo mesmo pa sallar pataques que pa matar un perru. Con ella na mano, podemos trabayar faciendo por que les plantes xorrezcan fermoses o acabar colo más noble y bonaz d’un güelpe. Pero hai bien dellos a los que l’agua fresco-yos da tantu ascu y el verde de vida tanta voltura alérxico, que nun son pa con ello: prefieren centrase na so particular competición de monos aulladores en metanes la nada y apoderalo too cola so miseria depredadora. Les penoses ¿discusiones? a cuenta d’una polémica col escritor Humberto Gonzali, que provocaron la reflesión de Marín Estrada y que tuvieron llugar nún de los pocos espacios d’alcuentru y alderique medianamente normalizáu con que los falantes d’asturianu contamos na rede -suplantaciones d’identidá/nomatu incluyíes-, cuento que nun valen pa definir l’espaciu qu’articula(mos) anguañu nesti país la comunidá d’asturfalantes; nin valen tampoco pa medir la trescendencia que, nesi espaciu, habría tener l’aturulle de les berríes doctrinaries, yá fueren inocentemente sinceres, babayamente xocoses o malinamente introducíes a costa fecha con escuru envís dañín pol propiu stablishment. Y nun valen por munchu qu’amenacen con apoderalo too: lo que cuido importa evaluar de forma amañoso ye la dinámica colaborativa que seique sí mos tien de ser propia y definir los nuesos actos; esto ye, saber apreciar y nutrise de la riqueza que supón la nuesa aportación universal -en cuantes que comunidá de falantes d’una llingua minoritaria- a la caltenencia y l’arrequicemientu d’un universu cultural milenariu que, tendrá mayor o menor dimensión o sedrá más o menos bayurosu o probe pa dalgunos, pero que, en cuantes qu’universu, ye en sigo mesmu únicu: l’asturianu. La presencia de mayor o menor númberu de monos aulladores nún ecosistema concreto, nun ye’l so indicador clave o principal y tampoco nun define por sí sola la riqueza biolóxico d’esi ecosistema, esto ye, la so apotación global a la biodiversidá del conxuntu’l planeta.

La facilidá de intercomunicación que mos ufren les nueves teunoloxíes –y seique esto de la Web 2.0, tien de ser más una actitú qu’una teunoloxía-, traduzse en pura llibertá. Y la llibertá tien demasiao valir como pa nun apreciar que nun paga’l tiru dedicar un minutu a los qu’amuesen cola so actitú la so miseria personal y la so sangrina castra. La custión nun ta en si ún “da la cara” firmando lo qu’escribe cola so entera filiación o si l’otru “s’escuende” tres d’un nomatu. ¿Daveres importa?. ¿Tien más valir un razonamientu qu’otru sólo por eso?.¿Les coses valen sólo en función de la so marca?. Cuido que nun ye esi’l problema. Dexase engañar asina y entrar al trapu de cuatro babayos onanistes indica un escosu nivel d’intelixencia emocional y seique tamién de cibercultura. Y lo qu’entá ye peor, una miopía autorreferencial muncho bien amiseriada y emprobecedora, orixe de la tarrecible caspa...

La trescendencia de les ferramientes siempre foi muncho más p’allá de la so cenciella repercusión práutica, dende l’apaición del primer raspador de piedra pente los primeros homínidos. Y les nueves teunoloxíes de comunicación nun son una esceición. Estes teunoloxíes tan valiéndonos anguaño a los asturfalantes pa iguar una articulación difusa y muncho bien actual d’Asturies; opuesta dafecho a esa otra articulación amiseriada, monolítica y valera -de corte rexonal-, que pretenden imponer a tola sociedá los ideólogos d’esa progresía xacobina de caleya que mos gobierna.

Mal que-yos pese a toos esos miserables que siguen y seguirán depredando los recursos económicos, naturales y culturales del nuesu país dende les sos poltrones, y tamién a los cortesanos que sobreviven gracies a les sos migayes, l’Asturies del sieglu XXI forma yá parte de Telépolis, la civitas glocal, diseminada y policéntrica del denomáu Tercer Entornu (sigún Echeverría: E1, Physis; E2, Polis; E3, Telépolis), sofitada y articulada nestes mesmes redes de comunicación. Telépolis configura una estructura nueva: una organización social na que conviven formatos d’actividá y de relaición direuta ente los axentes y los oxetos, allugaos n’espacios físicos definíos, xunto con otros formatos que nun requieren de presencia física de los individuos, nin siquier de la so ubicación temporal. Nun se trata de dos realidaes estremaes, sinón d’una sola realidá qu’alquier dimensiones y carauterístiques peculiares en función del entornu en que se concreta. Asina, la realidá de la cibersociedá asturiana nun ye “virtual”, nun ye una copia desnaturalizada –un sucedaniu, que se diz- d’entornos yá conocíos (Asturies como rexón), o incluso d’entornos más reales entá ensin acabar de definir (Asturies como país), sinón que constitúi un nuevu esquema de relación colos oxetos y coles persones. Ye un espaciu nuevu nel que llevar a cabu procesos sociales.

En Telépolis, la relevancia cuantitativa de los númberos ye relativa, porque seique les coses tienden a integrar categoríes definíes por afinidaes de calter simbólico-cultural, más qu’económico-político. Too ye al empar y en tolos llaos. Too ye igual d’accesible, nun hai un centru. Tamos énte una nueva realidá conformada de forma horizontal -en rede- que ye, esencialmente y por definición, colaborativa; una nueva realidá na que yá nun tien xacíu la vieya articulación verticalizada de calter tradicional (autoafirmativa o competitiva), qu’entama al tiempu a vese afectada pola fuerza gravitatoria de la nueva y descentralizada cibersociedá (de la torre a la rede).

Esto implica qu’anguaño –pa dellos seique paradóxicamente-, lo asturiano, va definise a partir de la so propia y particular potencia cultural y non pola mor d’una adscripción político-territorial más o menos artificiosa, falseada y dafecho desvirtuada. ¿Alonso y Melendi, o más bien el Surdimientu y la nueva música asturiana?. ¿L’adosáu na urbanización costera o l’horru como representación glocal allugáu nuna nueva quintana?. ¿”Conexión Asturias” o “Al aldu” y “Camín de Cantares”?. ¿El que llibremente escueye Asturies y de magar entós trabaya y vive nella faciendo país (Jorge Mochales, n’alcordanza), o el protagonista de turnu d’esa comedia bufa denomada “Pataca Connection” que tán bien sabe cultivar el nuesu diariu "lider", la voz del so amu, LNE?.

Lo asturiano va ser, destamiente, evolución, agiornamientu y arriquecimientu cola incorporación d’elementos y referencies esternes, d’esa carga de fonda potencia cultural asturiana de niciu tradicional: llingua, elementos culturales materiales ya inmateriales, instituciones xurídiques propies, etc. La nueva realidá trai consigo’l francimientu les llendes internes y esternes del vieyu territoriu de los ástures tresmontanos; y tamién la integración y confusión de los ámbitos público y priváu (fasta agora xebraos nel tradicional discursu políticu). Y esta nueva realidá nun sólo xenera nueves pautes culturales d’organización y socialidá humanes, sinón que constitúi dafecho –al traviés d’estremaes formes telemátiques d’interaición ya intercambiu d’información-, un nuevu espaciu d’identidá y de participación política. Un espaciu públicu, nel sen habermasianu del términu.

En Telépolis, la llingua sí que importa. La llingua propio define, caltién y re-crea l’universu cultural asturianu, agiornándolu y perpetuándolu. Equí, nesti nuevu entornu, la llingua sí fai a Asturies. Destamiente, Asturies dexa de ser la impostura de rexón que miren d’imponenos: una entidá valera de valires culturales propios, deconstruyida a costa fecha, ya impuesta a fuerza talonariu, cementu y TPA. Asturies sigue siendo entós un país vivu y con entidá propio, real, que non virtual. Daqué dinámico, non una impostura. Esti vieyu país a pique’l desaniciu, Asturies, renuévase asina, xenerando un nuevu espaciu propiu, un verdaderu Nuevu Mundu... ¿Por qué nun camudar esi primer impulsu de fuxida al monte pola firme determinación d’actuar n’otru entornu -Telépolis- calteniendo les propies coordenaes y la consustancial ya imprescindible actitú colaborativo-constructiva?. El prestosu afayu del blogue del propiu Pablo Antón Marín Estrada suxer que, de xuru, esi ha ser el camín; esi’l tayu nel que llograr qu’Asturies siga alendando a pesar de tanta imposición, tantu desaniciu y tanta falsedá.

La feliz convocatoria del I Sidra&Blogues pola Oficialidá que surdió apocayá de los collacios de Trayasgaya -col envís, ente más otro, d’entamar una Xunta de Blogueros/es en Llingua Asturiana-, nun ye otro que un reblagu más nesi camín que -cásique ensin proponémoslo y ensin querer-, empobínanos a los blogueros asturianos (seyamos pocos o munchos, meyores o peores, eso too ye relativo), dica la re-definición y re-construición d’Asturies, frente a la so deconstruición y desaniciu por parte los Poderes Públicos del Segundu Entornu.

Aquel viaxe traumáticu fuera la placenta del que-y falaba Manuel Asur a Marín Estrada, pudiere mui bien, a la fin, llevanos a tornar al abellugu dientro d’ella. Pero nesta vuelta intra placentae, los falantes d’esta amada y vieya llingua contamos con unos aperios y unes ferramientes que mos abren les puertes a una potencialidá anantia nunca conocida y nin siquier imaxinada: nesti nuevu Tercer Entornu reticular, horizontal y dafecho universal, sólo caben –por definición- les actitúes solidaries y colaboratives. El míseru “mundín asturianista”, afogáu en sí mesmu, redefínese asina pa pasar a una nueva versión, la del Asturianismu 2.0: equí nun tien xacíu tou esi enguedeyu falsu y ridículu de doctrinalismos, panfletarismos, personalismos, cainismos, rensíes, vengances y demás miseries nel que diz que tamos sapozaos los asturianos pola mor de nun sé cuala maldición antigua o nun sé qué carga xenética... Por eso esti nuevu entornu ye de nueso, del Ast 2.0. Y por eso’l futuru d’esta tierra/espaciu/realidá que ye Asturies, conformáu y definíu pola so llingua milenaria y por nós mesmos –l’Asturies que queremos de nueso y non esa impostura televisivo-comunicacional obra de depredadores babayos-, tamién lo habrá de ser. Por fuerza. ¡Gracies, collacios!. Seguimos trabayando...